لکھیم پور تشدد :مرکزی وزیر اجے مشرا کے بیٹے آشیش مشرا کو ضمانت دے دی گئی

Updated: February 11, 2022, 10:28 AM IST | Lucknow

مگر، ہائی کورٹ کی لکھنؤ بنچ نے پولیس کی تفتیش پر کئی سوال اٹھائے ، مظاہرین کے ہاتھوں مارے گئے افرادکیلئے انصاف کا حوالہ بھی دیا

 لکھیم پور کھیری تشدد کیس میں وزیر مملکت برائے داخلہ اجے مشرا کے بیٹے آشیش مشرا کی درخواست ضمانت ہائی کورٹ سے منظور ہو گئی ہے۔  الٰہ آ باد ہائی کورٹ کی لکھنؤ بنچ نے آشیش مشرا کو ضمانت  پر رہا کرنے کا حکم دیا ہے۔ اس معاملے کی سماعت پہلے ہی مکمل ہو چکی تھی اور عدالت نے اپنا فیصلہ محفوظ رکھا تھا۔ درخواست ضمانت منظور ہونے کے بعد توقع ہے کہ آشیش مشرا  تقریباً ۱۲۴؍ دن جیل میں رہنے کے بعد جمعہ کی دوپہر تک رہا ہو گا۔
  یاد رہے کہ لکھیم پور تشدد معاملہ میں ایس آئی ٹی نے حال ہی میں فرد جرم دائر کی تھی۔۵؍ صفحات پر مشتمل اس چارج شیٹ میں ایس آئی ٹی نے آشیش مشرا کو اہم ملزم نامزد کیا تھا۔ اتنا ہی نہیں ایس آئی ٹی  کے مطابق آشیش جائے وقوع پر موجود تھا۔ایس آئی ٹی نے اپنی جانچ میں لکھیم پور تشدد میں آشیش مشرا کے ہتھیاروں سے فائرنگ کی تصدیق کی تھی لیکن کورٹ نے پولیس اور ایس آئی ٹی کی تفتیش کے متعدد پہلوئوں پر سوال اٹھائے۔ضمانت دیتے ہوئے بنچ نے کہا کہ مظاہرین کے ہاتھوں مارے گئے ۳؍ افراد کی موت کو نظر انداز نہیں کیا جاسکتا۔ کورٹ کے مطابق اس معاملے میں چارج شیٹ دائر ہوگئی ہے اس لئے اب ضمانت دینے کا جواز پیدا ہو جاتا ہے