یوگی حکومت کے جنگل راج میں کس قدر لاقانونیت کا بول بالاہےاس کی مثال دیوریا میں اس وقت منظر عام پر آئی جب ایک شخص کو محض اس لئے قتل کر دیا گیا کہ اس نے اپنی بیٹی کے ساتھ چھیڑخانی کیے جانے کے خلاف آواز اٹھائی اور اس کی شکایت فریق مخالف سے کر دی۔

اکونا میں پیش آنے والے اس واقعہ میں شدید طور پر زخمی شمبھو ناتھ (تبدیل شدہ نام) کو ضلع اسپتال اور اس کےبعدگورکھپور میڈیکل کالج لے جایا گیا، جہاں ڈاکٹروںنےانہیں لکھنؤ پی جی آئی کیلئےریفر کر دیا۔ اس دوران راستہ میں ہی ان کی موت واقع ہو گئی۔ کانگریس کی جنرل سکریٹری پرینکا گاندھی نے اس واقعہ پر برہمی کا اظہار کرتے ہوئے پوچھا ہے کہ اب کوئی حکومت سے حفاظت کی امید کیسے کرے؟

پرینکا گاندھی نے اس خبر کو فیس بک پر شیئر کرتے ہوئےلکھا، ’’اتر پردیش کی بی جے پی حکومت میں تحفظ کا بنیادی نظام درہم برہم ہو گیا ہے۔ مجرموں میں قانون کا کوئی خوف نہیں ہے۔ دیوریا میں ایک والد کا قتل اس لئےکر دیا گیا کیونکہ انہوں نے اپنی بیٹی کے ساتھ ہو رہی چھیڑ خانی کی مخالفت کی۔ اب کوئی اس حکومت سے حفاظت کی امید کیسے کرے؟ جنگل راج قائم ہے۔‘‘

ہندی روزنامہ ’امر اجالا‘ کی رپورٹ کے مطابق اکوناتھانہ علاقہ کے ایشور پورا گاؤں میں جمعرات کی شام ایک لڑکی اپنے دروازے پر بیٹھی تھی۔ گاؤں میں رشتہ داری میں آئے ہوئے ایک نوجوان نے اس کے ساتھ چھیڑخانی کی۔ لڑکی نے نوجوان کی نازیبا حرکت کی شکایت اپنے والدسے کی۔ لڑکی کے والد نوجوان کے رشتہ دار کے گھر اس کی شکایت کرنے پہنچ گئے۔ الزام ہے کہ شکایت کے ایک گھنٹہ کے بعد رات کو تقریباً ۸؍بجےمخالف فریق کے لوگوں نے شکایت سے ناراض ہو کر متاثرہ کے گھر پر دھاوا بول دیا۔ ان لوگوں نے لاٹھی ڈنڈوں سے متاثرہ لڑکی کے والد کی پٹائی کر دی۔محلے کے لوگوں کے جمع ہونے پر پٹائی کرنے والے لوگ فرار ہو گئے۔

میڈیا رپورٹ کے مطابق اس معاملہ میں پولیس نے۲؍ملزمین کو حراست میں لیا ہے اور ان سے پوچھ گچھ کی جا رہی ہے۔ مہلوک کی بیوی کی تحریر پر پولیس نے۸؍افراد کے خلاف منصوبہ بند طریقہ سے مار پیٹ کرنے، چھیڑخانی اور غیر ارادتاً قتل کا مقدمہ درج کیا ہے۔