اویسی نے یوپی کے وزیر اعلیٰ اور سابق وزیراعلیٰ کے’ خواب‘ کا مذاق اڑایا

Updated: January 07, 2022, 11:05 AM IST | Agency | Moradabad /Bareilly

ایم آئی ایم سربراہ نےاکھلیش یادو کے خواب میں کرشن بھگوان اور یوگی کے خواب میں شری رام کے آنے پر طنز کیا ، کہا: ’’ دونوں  دن ہی میں مونگیری لال کے حسین سپنے دیکھ رہے ہیں ، خواب تو نوجوان دیکھتے ہیں، میرے خواب میں کورونا کے ستائے ہوئے لوگ آتے ہیں ۔‘‘

: آل انڈیا مجلس اتحاد المسلمین(اے آئی ایم آئی ایم) کے صدر اور حیدرآباد  کے رکن پارلیمنٹ اسد الدین اویسی نے اتر پردیش کے سابق وزیر اعلیٰ اکھلیش یادو  کے خواب میں کرشن بھگوان اور وزیراعلیٰ یوگی آدتیہ ناتھ کے خواب میں شری رام کے آنے کے دعویٰ  کا مذاق اڑاتے ہوئے کہا :’’ میرے خواب میں صرف کورونا کے ستائے ہوئے لوگ آتے ہیں۔‘‘ اویسی بدھ اور جمعرات کو  مرادآباد میں مقیم تھے ۔ بدھ کو بریلی روانہ ہونے سے قبل میڈیا  کے نمائندوں سے خطاب کرتے ہوئے انہوں نے :’’ سماج وادی پارٹی(ایس پی) کےسربرا ہ اکھلیش یادو اور اترپردیش کے وزیر اعلیٰ یوگی آدتیہ ناتھ  دن ہی میں  مونگیری  لا ل کے حسین سپنے  دیکھ رہے ہیں۔‘‘  رکن پارلیمنٹ نے مزید کہا:’’ اکھلیش یادو کے خواب میں آج کل  کرشن بھگوان آرہے ہیں اور وزیر اعلی یوگی آدتیہ ناتھ کے سپنے میں شری رام۔میں کہنا چاہتاہوں کہ خواب ’ نوجوان‘ دیکھتے ہیں۔‘‘ایم آئی ایم لیڈر نے دونوں لیڈروں کے حکومت بنانے کے دعویٰ کا ذکر کرتےہوئے  کہا :’’  دونوں  وقت گنوائے بغیر راج بھون جا کر گورنر سے مل کر حلف  کیوں نہیں لے لیتے؟‘‘ ان کے بقول :’’ جب بھگوان نے اکھلیش یاد وکے سپنے میں آکر کہہ دیا ہے کہ تم سی ایم بن  رہے ہو تو الیکشن کی ضرورت ہی نہیں ہے۔ راج بھون جا کر کہہ دیں کہ بھگوان نے کہہ دیا ہے کہ مجھے سی ایم بنائیے۔‘‘سیاست میں مسلمانوں کی شراکت داری کا ڈاٹا تیار کرنے اور جلد ہی  اسے لکھنؤ سے شائع کرنے کا ذکر کرتے ہوئے اویسی نے کہا: ’’اس باراترپردیش کے مسلمانوں کی سیاست میں کتنیحصہ داری ہوگی؟ اس سلسلے میں ماہرین سے ہر طرح کا ڈاٹا تیار کروایا گیا ہے۔جلد ہی  اسےمنظر عام پر لایا جائے گا۔ ‘‘