ویسٹ انڈیز نے ٹی ۲۰؍ ورلڈکپ میں فتح کا مزہ چکھ لیا

Updated: October 30, 2021, 1:27 PM IST | Agency | Sharjah

 سپر۱۲؍ راؤنڈ میں بنگلہ دیش کو ۳؍رن سے شکست دے کر ۲؍پوائنٹس حاصل کئے

ویسٹ انڈیز کی ٹیم کے کھلاڑی بنگلہ دیشی کھلاڑی کو آؤٹ کرنے کے بعد دیکھے جاسکتے ہیں۔ تصویر: آئی این این

ویسٹ انڈیز نے بنگلہ دیش کو دلچسپ مقابلے  میں ۳؍ رن سے شکست دے دی۔  شارجہ میں کھیلے جانےوالے ٹی ۲۰؍ ورلڈکپ کے ۳۰؍ویںمیچ میں ویسٹ انڈیز نے پہلے بیٹنگ کرتے ہوئے مقررہ۲۰؍ اوورس میں ۷؍ وکٹ کے نقصان پر۱۴۲؍ رن  بنائے۔ بنگلہ دیش کی جانب سے اننگز کا آغاز کرنے والے محمد نعیم۱۷؍ اور شکیب الحسن ۹؍ رن  بناسکے البتہ لٹن داس نے۴۴؍ رن  کی ذمہ دارانہ اننگز کھیلی، سومیا سرکار۱۷؍ اور مشفق الرحیم ۸؍ رن بناکر آؤٹ ہوئے۔ بنگلہ دیش کو آخری گیند پر  ۴؍رن درکار تھے اور کپتان محموداللہ۳۱؍ رن  پر ناٹ آؤٹ رہ کر بھی اپنی ٹیم کو جیت سے ہمکنار نہ کروا سکے۔ ویسٹ انڈیز کی جانب سے روی رامپال، جیسن ہولڈر، آندرے رسل، عقیل حسین اور ڈیون براوو نے ایک ایک وکٹ  لیا۔اس سے قبل بنگلہ  دیش نے ٹاس جیت کر فیلڈنگ کا فیصلہ کیا تو ویسٹ انڈیز کی جانب سے اننگز کا آغاز کرس گیل اور ایون لیوس نے کیا تاہم دونوں اوپنرس خاص کارکردگی کا مظاہرہ نہ کرسکے اور صرف۱۸؍ کے مجموعی اسکور پر پویلین لوٹ گئے۔ ون ڈاؤن آنے والے روسٹین چیز نے بنگلہ دیشی بولرس کے آگے مزاحمت جاری رکھی اور۳۹؍ رن  بنائے جب کہ نکولس پورن نے جارحانہ انداز اپنایا اور۲۲؍گیندوں پر ۴۰؍ رن  بنائے۔ بنگلہ  دیشی بولرس کی زبردست بولنگ کے باعث دیگر کھلاڑیوں نے خاص کارکردگی کا مظاہرہ نہ کیا اور ویسٹ انڈیز کی ٹیم مقررہ۲۰؍ اوور میں ۷؍ وکٹ  پر صرف۱۴۲؍ رن ہی بناسکی۔