سمیع دنیا کے ۳؍ بہترین گیندبازوں میں سےایک:وراٹ

Updated: January 01, 2022, 12:58 PM IST | Agency | Centurion

ہندوستانی ٹیم کے کپتان وراٹ کوہلی نے محمد سمیع کو اس وقت دنیا کے بہترین ۳؍ گیند بازوں میں سے ایک قرار دیا ہے۔

محمد سمیع تصویر: آئی این این

 ہندوستانی ٹیم کے کپتان وراٹ کوہلی نے محمد سمیع کو اس وقت دنیا کے بہترین ۳؍ گیند بازوں میں سے ایک قرار دیا ہے۔ انہوں نے میچ کے بعد کہا ’’مجھے خوشی ہے کہ سمیع نے اپنا ۲۰۰؍واں وکٹ لیا اور میچ پراپنا اثر ڈالا۔‘‘ ہندوستان کی جنوبی افریقہ پر۱۱۳؍ رن  سے فتح  میں سمیع نے پہلی اننگز میں ۵؍ اور دوسری میں ۳؍ وکٹ لئے۔ انہوں نے ہندوستانی گیندبازی لائن اپ کا بیڑہ اس وقت بھی اٹھایا جب چوٹ کے سبب جسپریت بمراہ تقریباً ۲؍ گھنٹے تک میدان سے دور رہے۔ وراٹ کوہلی نے کہا’’محمد سمیع ایک ورلڈ کلاس گیند باز ہیں۔ میرے لئے تو وہ موجودہ وقت کے بہترین ۳؍ گیندبازوں میں سے ایک ہیں۔ ان کی مضبوط کلائیاں، ان کی سیم پوزیشن اور مسلسل ایک ہی لینتھ پر گیندبازی انہیں بہترین بناتی ہے۔ کپتان نے پوری تیز گیندبازی لائن اپ کی تعریف کی اور کہا، ’’جس طرح سے تمام گیند بازوں نے گیند بازی کی، وہ بہترین ہے۔ یہ صرف اس میچ کی بات نہیں ہے، وہ لگاتار دو تین برسوں سے ایساکر رہےہیں۔ بارش سے متاثرہ اس میچ میں ہندوستان  نے ٹاس جیت کر پہلے بیٹنگ کا فیصلہ کیاتھا۔ اس دن ہندوستانی سلامی بلے بازوں نے  عمدہ بیٹنگ کرتے ہوئے ہندوستان کو فیصلہ کن اسکور بنانے میں مدد کی۔ وراٹ نے کہا’’پہلے بلے بازی کرنا ایک مشکل چیلنج تھا، لیکن مینک اور راہل نے بہترین نظم و ضبط کا مظاہرہ کیا۔ ہمیں معلوم تھا کہ اگر ہم ۳۰۰؍ سے۳۲۰؍ تک اسکور کر سکتے ہیں تو ہم میچ میں آگے ہوں گے۔ ہمیں اپنی گیندبازی یونٹ پر پورا  یقین تھا۔