EPAPER
Updated: November 23, 2021, 1:25 PM IST | Agency
تیسرے ٹی ۲۰؍ میں ہندوستان کی ۷۳؍رن سے فتح۔ سیریز پر صفر۔۳؍ سے قبضہ ۔ روہت شرما نے آخری میچ میں نصف سنچری بنائی۔ اکشر پٹیل نے ۳؍کھلاڑیوں کو پویلین کی راہ دکھائی ۔نوجوانوں کی اچھی کارکردگی
کپتان روہت شرما (۵۶؍رن) کی شاندار نصف سنچری ، لیفٹ آرم اسپنر اکشر پٹیل (۹؍ رن پر۳؍ وکٹ ) اور آل راؤنڈر ہرشل پٹیل (۱۸؍ اور۲۶؍ رن پر ۲؍ وکٹ) کی بدولت ہندوستان نے نیوزی لینڈ کو تیسرے اور آخری ٹی ۲۰؍ میں اتوار کو۷۳؍ رن سےشکست دے کر ۳؍ میچوں کی سیریز میں صفر۔۳؍سے کلین سویپ کر لیا۔ ہندوستانی ٹیم نے طوفانی آغاز اور آخری اوور میں بہترین اسٹرائیک کی بدولت ۲۰؍ اوور میں ۷؍ وکٹ پر ۱۸۴؍ رن کا مضبوط اسکور بنایا اور نیوزی لینڈ کو۱۷ء۲؍ اوور میں۱۱۱؍ رن پرشکست دے کر سیریز کو کلین سویپ کیا اور مہمان ٹیم سے ورلڈ کپ کے گروپ میچ میں ملنے والی شکست کا حساب بے باق کردیا۔ ہندوستانی ٹیم کے نئے کپتان روہت شرما نے ٹاس جیت کر پہلے بلےبازی کا فیصلہ کیا ۔ ہندوستان لوکیش راہل اور روی چندرن اشون کو آرام دے کر ایشان کشن اور یزویندر چہل کو ٹیم میں لائے۔ ہندوستان کو روہت اورکشن نے ہندوستان کو طوفانی شروعات دلائی اور پہلے ۶؍ اوور میں۶۹؍ رن بنائے۔ اس دوران روہت اور کشن دونوں نے زبردست شاٹس لگائے۔ روہت نے۵۶؍ رن کی اپنی اننگز کا تیسرا چھکا لگاتے ہوئے ٹی۲۰؍ میں اپنے۱۵۰؍ چھکے مکمل کیے۔ کشن نے ۲۱؍گیندوں پر ۲۹؍رن میں ۷؍ چوکے لگائے ۔مشیل سینٹنر نے اس اوور کی آخری گیند پر سوریہ کمار یادو کو بھی پویلین کا راستہ دکھایا ۔ رشبھ پنت ۶؍ گیندوں میں ۴؍ رن بنا کر سینٹنرکے دوسرے اور ۹؍ویں اوور کی آخری گیند پر آؤٹ ہوئے ۔ رشبھ پنت کا وکٹ۸۳؍رن کے اسکور پر گرا۔ کپتان روہت نے چوکا لگا کر اپنی نصف سنچری مکمل کی لیکن پھر وہ لیگ اسپنر ایش سوڈھی کو ریٹرن کیچ دے بیٹھے ۔ روہت نے آگے بڑھ کر زور دار شاٹ لگایا لیکن گیند سوڈھی کے دائیں ہاتھ میں جا کرچپک گئی ۔ روہت اپنی ۲۶؍ویں نصف سنچری بنانے کے بعد آؤٹ ہوئے۔ انہوں نے۳۱؍ گیندوں پر۵۶؍ رن میں ۵؍ چوکے اور ۳؍ چھکے لگائے۔ روہت کا وکٹ۱۰۳؍رن کے اسکور پر گرا ۔
شریس ایّر اوروینکٹیش ایّر نے ۵؍ویں وکٹ کیلئے ۳۶؍ رن بنائے لیکن اس کے بعد دونوں بلے باز ایک رن کے فاصلے پر آؤٹ ہو گئے ۔ وینکٹیش کو ٹرینٹ بولٹ نے چیپ مین کے ہاتھوں کیچ کروایا جبکہ شریس کو ایڈم ملنے نے آؤٹ کیا۔ وینکٹیش نے۲۰؍ رن بنائے جبکہ شریس نے ۲۵؍ رن بنائے۔ ہرشل پٹیل نے۱۱؍ گیندوں میں ۲؍ چوکوں اور ایک چھکے کی مدد سے۱۸؍ رن بنائے۔ اکشر پٹیل ۲؍ رن بنا کر ناٹ آؤٹ رہے جبکہ دیپک چاہر نے۸؍ گیندوں پر۲؍ چوکوں اور ایک چھکے کی مدد سے۲۱؍ رن بنائے۔ ہندوستان کی اننگز۱۸۴؍ رن کے مضبوط اسکور پر ختم ہوئی ۔
نیوزی لینڈ کی ٹیم۱۱۱؍ رن پر ڈھیر ہوکراپنے رن کے لحاظ سے چوتھی سب سے بڑی شکست سے دوچارہوئی۔ ہندوستان نے اپنا چھٹا کلین سویپ کیا اور سب سے زیادہ کلین سویپ کرنے کی پاکستان کی برابری کرلی ۔ ہندوستان دوفریقی سیریز میں کی نیوزی لینڈ کے خلاف یہ۸؍ویں جیت ہے اور مہمان ٹیم کے خلاف اس کی لگاتار دوسری سیریز جیت ہے ۔ ہندوستان نے ۲۰۲۰ء کے دورۂ نیوزی لینڈ میں صفر۔۵؍ سے کامیابی حاصل کی تھی۔ لیفٹ آرم اسپنر اکشر پٹیل نے پہلے ۳؍ وکٹ لے کر نیوزی لینڈ کی بلے بازی کی کمر توڑی کہ وہ آخر تک سنبھل نہ پائی ۔ صرف مارٹن گپٹل نے اپنے فارم کوبرقرار رکھتے ہوئے ۳۶؍ گیندوں میں ۴؍ چوکوں اور ۴؍ چھکوں کی مدد سے۵۱؍ رن بنائے لیکن ان کے۶۹؍ رن پر آؤٹ ہو جانے کے بعد نیوزی لینڈ کی آخری امید بھی دم توڑ گئی۔ گپٹل کو لیگ اسپنر یزویندر چہل نے سوریہ کمار یادو کے ہاتھوں کیچ آؤٹ کروایا ۔ ٹم سیفرٹ۱۸؍ گیندوں پر۱۷؍ رن بنانے کے بعد رن آؤٹ ہوئے۔ لوکی فرگیوسن نے۸؍ گیندوں پر ۲؍ چھکوں کی مدد سے ۱۴؍ رن بنائے ۔ ہندوستان کی جانب سے اکشر پٹیل کی ۳؍ وکٹوں کے علاوہ ہرشل پٹیل نے۲؍ وکٹ لئےجبکہ دیپک چاہر، چہل اور وینکٹیش نے ایک ایک وکٹ لیا ۔ اکشر پٹیل کو ان کی گیند بازی پر پلیئر آف دی میچ کا ایوارڈ ملا جبکہ کپتان روہت شرما کو پلیئر آف دی سیریز کا ایوارڈ ملا۔
