ہندوستانی گیندبازوں کے سامنے انگریز بلے باز پھر بے بس

Updated: March 05, 2021, 1:36 PM IST | Agency | Ahmedabad

چوتھے ٹیسٹ میچ میں انگلینڈ کی پوری ٹیم ۲۰۵؍رن بناکر آؤٹ،اکشر پٹیل نے ۴؍جبکہ اشون نے ۳؍بلے بازوں کو آؤٹ کیا،محمد سراج نے بھی ۲؍بلے بازوں کو پویلین کی راہ دکھائی

ٹیم انڈیا۔تصویر :آئی این این

بائیں ہاتھ کے اسپن گیندباز اکشر پٹیل اور روی چندرن اشون،  جو انگلش بلے بازوں کے لئے درد سر بن چکے ہیں، نے ایک بار پھر خطرناک  بولنگ کرتے ہوئے یہاں جمعرات کو  چوتھے اور آخری ٹیسٹ کے پہلے دن بالترتیب ۴؍ اور ۳؍ وکٹیں لیتے ہوئے انگلینڈ کو پہلی اننگز میں ۲۰۵؍ رنوں پر سمیٹ دیا۔ دن کے کھیل کے اختتام تک ، ہندوستان نے ۱۲؍ اووروں میں ایک وکٹ کے نقصان پر ۲۴؍ رن بنا لئے ہیں۔ ہندوستان پہلی اننگز میں ۱۸۱؍ رنوں سے پیچھے ہے۔اکشر پٹیل نے دوسرے ٹیسٹ میں اپنے فارم برقرار رکھتے ہوئے انگلش بلے بازوں کو ایک بار پھر نریندر مودی اسٹیڈیم کی پچ پر گھٹنے ٹیکنے پر مجبور کردیا۔ پچھلے میچ میں ۱۱؍ وکٹیں حاصل کرنے والے پٹیل نے آخری ٹیسٹ میں ۲۶؍ اوور میں ۶۸؍ رن پر ۴؍ وکٹیں حاصل کیں ، اشون نے ۱۹ء۵؍  اوور میں ۴۳؍رن پر ۳؍ ،  تیز گیندباز محمد سراج نے ۱۴؍ اووروں میں ۴۵؍رن پر ۲؍ اورپارٹ  ٹائم آف اسپنر واشنگٹن سندر نے ۷؍ اوور میں ۱۴؍رن دے کر ایک وکٹ حاصل کیا۔ ہندوستان نے اسٹمپس تک شبھمن گل کاوکٹ گنوایا  جنہیں تیز گیندباز انڈرسن نے ایل بی ڈبلیو کیا۔ روہت شرما ۸؍ اور چیتشور پجارا ۱۵؍ رن بنا کر کریز پر موجود ہیں۔ انگلینڈ کی جانب سے بین اسٹوکس نے سب سے زیادہ ۵۵؍اور ڈینیل لارنس نے ۴۶؍ رن بنائے۔ کپتان جو روٹ ۵؍ رن بنا کر آؤٹ ہوئے۔ انگلینڈ نے ٹاس جیت کر پہلے بیٹنگ کا فیصلہ کیا تھا۔ انگلینڈ کو اچھی شروعات دینے کے لئے  اوپنر جیک کراؤلی اور ڈومینک سیبلے ایک بار پھر اکشر کے سامنے بے بس نظر آئے۔ اکشرکا پہلا شکار سیبلےبنےجو ۲؍رن پر ہی  ان کی گیند پر بولڈ ہوگئے۔ اس کے بعد کراؤلی بھی ۹؍ رن بنا کر چلتے بنے۔ اکشر نے انہیں  محمد سراج کے ہاتھوں کیچ کرایا۔اس طرح انگلینڈ کے ابتدائی ۲؍ وکٹ بالترتیب ۱۰؍ اور ۱۵؍رن پر گرے۔
 آراشون بھی بولنگ محاذ پر پیچھے نہیں رہے۔ انہوں نے مڈل آرڈر بلے باز اولی پوپ کی صورت میں اپنا پہلا شکار کیا جو اچھا کھیلنے کے باوجود۲۹؍ رن پر شبھمن گل کے ہاتھوں کیچ ہوگئے۔ اشون کا اگلانشانہ وکٹ کیپر بلے باز بین فاکس بنےجنہیں اشون نے ایک رن پر پویلین بھیج دیا۔ اس طرح اکشر اور اشون نے مجموعی طور پر ۷؍ وکٹیں اپنے نام کیں۔اس بار  تیز گیندباز محمد سراج کا بھی سکہ چمکا۔ انہوں نے جانی بیئرسٹو اور کپتان جو روٹ کی شکل میں اہم وکٹ حاصل کئے۔ سراج نے دونوں کو ایل بی ڈبلیو کیا۔ بیئرسٹو نے ۲۸؍اور روٹ صرف ۵؍ رن بنا سکے اور مایوس ہوکر پویلین لوٹ گئے۔  پہلے دن کے نقطہ نظر سے دیکھیں تو  واشنگٹن سندر نے بین اسٹوکس کا سب سے اہم وکٹ حاصل کیا۔ اسٹوکس انگلینڈ کی جانب سے پہلی اننگز میں سب سے زیادہ رن بنانے والے کھلاڑی بنے۔ ان کی ۵۵؍رنوں کی نصف سنچری اننگز نے انگلینڈ کو ۲۰۰؍کے اسکور تک پہنچایا۔ اسٹوکس نے ۱۲۱؍گیندوں کی اننگز میں ۶؍چوکے اور ۲؍ چھکے لگائے۔ اکشر اور اشون کی جوڑی نے مسلسل تیسرے ٹیسٹ میچ میں انگلینڈ کے بلے بازی کی کمرتوڑ دی۔ جہاں اکشر نے اوپنرز کو اپنی گرفت میں لیا، وہیں اشون نے مڈل آرڈر کے ۲؍ اہم بلے بازوں کو اپنا شکار بنایا۔ انگلینڈ کا پہلا وکٹ ۱۰؍ رن کے اسکور پر گرا۔ اکشر نے پہلے دن کے چھٹے اوور کی دوسری گیند پر  سبیلےکو بولڈ کردیا۔ اس کے فوراً بعد انہوں نے کراؤلی کو کیچ آؤٹ کرایا۔ اس طرح انگلینڈ نے اپنادوسرا وکٹ ۱۵؍رن پر گنوا دیا۔ اس کے بعد بولنگ کرنے آئے  محمدسراج نے بھی دم دار گیندبازی کی اور تجربہ کار بلے بازوں بیئرسٹو اور روٹ کا وکٹ اپنے نام کیا۔ بیئرسٹو اور روٹ کے شکل میں انگلینڈ کا بالترتیب تیسرا اور چوتھا وکٹ گرا۔ اس کے بعد اسٹوکس اور پوپ نے اپنی ذمہ داری سنبھالی اور کریز پر قدم جمائے۔ دونوں نے پانچویں وکٹ کے لئے ۴۳؍رنوں کی شراکت کی لیکن نوجوان گیندباز  سندر نے اسٹوکس کو ایل بی ڈبلیو کرکے شراکت توڑ دی۔ اس طرح انگلینڈ کا پانچواں وکٹ ۱۲۱؍رن پر گرا۔ اس کے بعد بیٹنگ کرنے آئے ڈینیئل لارنس بھی اچھے فارم میں دکھےاور انہوں نے پوپ کے ساتھ ۴۵؍رنوں کی شراکت کی۔ اس درمیان اشون نے پوپ کو آؤٹ کرکے شراکت اور انگلینڈ کی امیدوں دونوں کو توڑدیا۔ لارنس بھی زیادہ دیر تک نہیں ٹک پائے اور اکشر کی گیند پر وکٹ کیپر رشبھ پنت کے ہاتھوں اسٹمپ آؤٹ ہوگئے۔ ۱۷۰؍رن پریہ انگلینڈ کا ساتواں وکٹ تھا۔اس کے بعد اکشر اور اشون نے ۳۵؍رنوں پر آخری ۳؍ وکٹ گراکرانگلینڈ کو ۲۰۵؍رنوں پر آل آؤٹ کردیا۔ وکٹ کیپر بین فاکس ایک، ڈوم بیس ۳؍ اور جیک لیچ ۳؍ رنز بنا کر آؤٹ ہوئے۔ تیز گیندباز جیمس اینڈرسن ۱۰؍رن بناکر ناٹ آؤٹ رہے۔کھیل کا دوسرا دن دونوں ٹیموں کےلئے کافی اہمیت کا حامل ہوگا۔ٹیم انڈیا جہاں اچھی بلے بازی کرتے ہوئے بڑی سبقت حاصل کرنے کی کوشش کرےگی وہیں مہمان ٹیم کے گیندباز ہندوستانی بلے بازوں  کو سستے میں نمٹانے کیلئے ایڑی چوٹی کا زور لگا دیںگے