ٹیم انڈیا کیخلاف آسٹریلیاکا مضبوط آغاز،لابوشین اور پکووسکی کی ہاف سنچریاں

Updated: January 08, 2021, 10:57 AM IST | Agency | Sydney

بارش سے متاثر پہلے دن میزبان ٹیم نے ۲؍وکٹوں کے نقصان پر۱۶۶؍رن بنا لئے، وکٹ کیپررشبھ پنت نے ۲؍کیچ چھوڑے ،محمدسراج اور نودیپ سینی کو ایک ایک وکٹ حاصل ہوا

ہندوستانی ٹیم کے اسپن گیند باز آر اشون کو تیسرے ٹیسٹ کے پہلے دن ایک بھی وکٹ نہیں مل سکی۔ تصویر:پی ٹی آئی

مارنس لابوشین (ناٹ آؤٹ ۶۷) اور ڈیبیو میچ  کھیلنے والے وِل پُکوسکی (۶۲)کی شاندار نصف سنچریوں کی بدولت آسٹریلیا  نے ہندوستان کے خلاف بارش کے سبب متاثرتیسرے ٹیسٹ کے پہلے دن جمعرات کو پہلی  اننگز میں دن کا کھیل ختم ہونے تک ۵۵؍اوور میں ۲؍ وکٹ کے نقصان پر ۱۶۶؍ رن بنا لئے۔ ہندوستان کی جانب سے تیز گیندباز محمد سراج اور ڈیبیو کرنے والے تیز گیندباز نودیپ سینی نے ایک ایک وکٹ لیا۔   وہ ٹیسٹ میں اپنے کریئر کا آغاز کرنے والے ہندوستان کے ۲۹۹؍ویں کھلاڑی بن گئے جبکہ آسٹریلیا کی جانب سے ڈیبیو کرنے والے پکووسکی ۴۶۰؍ویں کھلاڑی بنے۔  لابوشین نے ۱۴۹؍گیندوں میں ۸؍ چوکوں کی مدد سے ناٹ آؤٹ ۶۷؍رن بنائے جبکہ پکووسکی نے۱۱۰؍گیندوں کا سامنا کرتے ہوئے ۴؍  چوکوں کی مدد سے ۶۲؍رن بنائے۔ اسٹمپس کے وقت لابوشین ۶۲؍رن اور اسٹیو اسمتھ ۶۴؍ گیندوں میں ۵؍ شاندار چوکوں کی مدد سے ۳۱؍ رن بنا کر کریز پر موجود ہیں۔ اسمتھ نے گزشتہ ۲؍ ٹیسٹ کی ناکامی کو پس پشت ڈالتے ہوئے مضبوطی کے ساتھ بلے بازی کی اور ہندوستانی آف اسپنر آر اشون کو خود پر حاوی نہیں ہونے دیا۔
 دو ٹیسٹ سے باہر رہنے کے بعد واپسی کرنے والے اوپنر ڈیوڈ وارنر محض ۵؍ رن بنا کر آؤٹ ہو گئے۔  آسٹریلیا کے کپتان ٹِم پین نے ٹاس جیت کر پہلے بلے بازی کرنے کا فیصلہ کیا لیکن محمد سراج نے  اننگز کے چوتھے اوور کی تیسری گیند پر اوپنر ڈیوڈ وارنر کو سلپ میں چیتیشور پجارا کے ہاتھوں کیچ آؤٹ کر کے ۶؍ رن کے اسکور پر میزبان ٹیم کو پہلا جھٹکا دیا۔ وارنر ۸؍ گیندوں میں ۵؍ رن بنا کر پویلین لوٹ گئے۔بعد ازاں تیسرے نمبر پر بلے بازی کرنے آئے لابوشین نے پُکووسکی کا بخوبی ساتھ دیا اور دونوں نے دھیرے دھیرے کھیلتے ہوئے  اننگز کو سنبھالتے ہوئے ٹیم کے اسکور کو آگے بڑھایا۔ اس درمیان رک رک کر ہونے والی بارش کے سبب کھیل کئی بار روکنا پڑا اور پہلے دن محض ۵۵؍اوور کا ہی کھیل ہو سکا۔ پُکووسکی اور لابوشین نے دوسرے وکٹ کے لئے ۱۰۰؍رنوں کی شاندار شراکت داری کی۔ ہندوستان کی جانب سے کرکٹ میں ڈیبیو کرنے والے تیز گیندباز نودیپ سینی نے پُکووسکی کو  ایل بی ڈبلیو آؤٹ کرکے اس شراکت داری کو توڑا۔ پُکووسکی نے ۱۱۰؍ گیندوں کا سامنا کرتے ہوئے ۴؍  چوکوں کی مدد سے ۶۲؍رن بنائے۔پُکووسکی کو  اننگز میں ۲؍زندگیاں  ملیں۔ پہلی بار ۲۶؍رن کے نجی اسکور پر پُکووسکی کا اشون کی گیند پر وکٹ کیپر رشبھ پنت نے ایک بہت ہی آسان کیچ چھوڑ دیا جبکہ دوسری بار ۳۲؍ رن پر سراج کی گیند پر رشبھ پنت نے ہی پُکووسکی کو پویلین بھیجنے کا مزید ایک موقع گنوا دیا جو کہ مہمان ٹیم کو بھاری پڑا۔
 پُکووسکی کے آؤٹ ہونے کے بعد چوتھے نمبر پر بلے بازی کرنے آئے نامور بلے باز اسٹیون اسمتھ شاندار فارم میں نظر آئے اور انہوں نے آتے ہی تابڑتوڑ چوکے لگانے شروع کر دئیے۔ لابوشین اور اسمتھ نے مل کر آسٹریلیائی ٹیم کے اسکور کو ۱۵۰؍کے پار پہنچایا۔ اس درمیان لابوشین نے اپنی نصف سنچری بھی مکمل کر لی۔ دونوں بلے بازوں کے مابین ۶۰؍ رن کی شراکت داری ہو چکی ہے۔ ہندوستان کی جانب سے کوئی بھی گیندباز آسٹریلیائی گیندبازوں کو کچھ خاص پریشان نہ کر سکا۔  جسپریت بمراہ نے ۱۴؍ اوور میں ۳؍ میڈن اوور پھینکے لیکن انھیں وکٹ نہیں ملا۔  محمدسراج نے ۱۴؍ اوور میں ۴۶؍ رن دے کر ایک وکٹ لیا۔  آر اشون نے ۱۷؍ اوور گیندبازی کی لیکن انھیں بھی کوئی کامیابی ہاتھ نہیں آئی۔ ٹیسٹ کرکٹ میں ڈیبیو کرنے والے نودیپ سینی نے ۷؍ اوور میں ۳۲؍رن دے کر ایک وکٹ حاصل کیا۔ اسمتھ اور لابوشین میزبان ٹیم کی پاری کو سنبھالے ہوئے ہیں اور ٹیم کو ایک مضبوط اسکور کی جانب لے جانے کی کوشش کر رہے ہیں۔ اگر ہندوستان کو آسٹریلیا کو ایک مضبوط اسکور بنانے سے روکنا ہے تو دوسرے دن ہندوستانی گیند بازوں کو کچھ کمال کرنا ہوگا۔جسپریت بمراہ ۱۴؍ اوور میں ۳۰؍رن، اشون ۱۷؍اوور میں ۵۶؍رن اور رویندر جڈیجہ ۳؍ اوور میں ۲؍ رن دے کر وکٹ نہیں لے پائے ہیں جبکہ سراج کو ۱۴؍اوور میں ۴۶؍رن پر ایک وکٹ اور سینی کو ۷؍ اوور میں ۳۲؍رن پر ایک وکٹ ملا ہے۔پہلے دن کا کھیل ختم ہونے تک لابوشین ۶۷؍رن بنا کر جبکہ اسٹیون اسمتھ ۶۴؍ گیندوں میں ۵؍ شاندار چوکوں کی مدد سے ۳۱؍رن بنا کر کریز پر موجود ہیں۔