برطانیہ : نئے پولیس نظام کےخلاف احتجاج شدید ، مظاہرین کا تھانے پر حملہ

Updated: March 23, 2021, 10:58 AM IST | Agency

برطانیہ میں مجوزہ نئے پولیس نظام کے خلاف احتجاج کرتےہوئے مظاہرین نے یہاںایک تھانے پر حملہ کردیا جس کے نتیجے میں۲۰؍ پولیس اہلکار زخمی ہوگئے۔

یوکے پولیس ۔ تصویر : آئی این این

برطانیہ میں مجوزہ نئے پولیس نظام کے خلاف  احتجاج کرتےہوئے مظاہرین نے یہاںایک تھانے پر حملہ کردیا جس کے نتیجے میں۲۰؍ پولیس اہلکار زخمی ہوگئے۔برطانیہ میں مظاہرین اور پولیس کے درمیان ہونے والی جھڑپ میں ۲۰؍ اہلکار زخمی ہوئے ہیں جن میں  سے ۲؍کی حالت نازک بتائی جا رہی ہے۔ عالمی ذرائع کے مطابق کے مطابق برطانیہ کے شہر برسٹل میں نئے پولیس نظام کے لیے کی گئی قانون سازی کے خلاف مظاہرہ کیا گیا جس میں شرکاء نے’ برطانیہ کو پولیس اسٹیٹ نہ بناؤ‘ اور’ احتجاج بنیادی انسانی حق ہے‘ کے بینرز اُٹھا رکھے تھے۔
 پولیس نے مظاہرین کو منتشر کرنے کی کوشش کی جس پر مظاہرین مشتعل ہوگئے اور پولیس اسٹیشن پر حملہ کرکے۱۲؍ گاڑیوں کے شیشے توڑ دیئے اور۲؍کو آگ لگادی گئی۔ اس دوران جھڑپ میں۲۰؍ اہلکار زخمی ہوگئے جن میں سے دو کی حالت نازک بتائی جاری ہے۔
 پولیس نے ہنگامہ آرائی کے الزام میں۷؍مظاہرین کو حراست میں لے لیا ہے جب کہ مظاہرین نے الزام عائد کیا کہ پولیس نے پیلٹ گن، اسٹون گن اور آنسو گیس کا بے دریغ استعمال کیا۔واضح رہے کہ برطانیہ میں نئی قانون سازی کے ذریعے پولیس کے اختیارات میں اضافہ کردیا گیا ہے جس پر مختلف شہروں میں احتجاجی مظاہروں کا سلسلہ جاری ہے۔