ملک نے پائیدار ترقی کے اہداف کو حاصل کرنےمیں قابل ذکر پیش رفت کی ہے

Updated: February 01, 2022, 11:44 AM IST | Agency | New Delhi

ایس ڈی جی انڈیا انڈیکس اور ڈیش بورڈ پر ملک کا اسکور مالی سال۲۱-۲۰۲۰ء میں بڑھ کر۶۶؍ ہو گیا جسے اچھا اشارہ قراردیاجارہا ہے

 خزانہ اور کارپوریٹ امور کی مرکزی وزیر نرملا سیتا رمن نےپیر کو پارلیمنٹ میںمعاشی سروے پیش کرتے ہوئے ترقی اور اہداف کے مختلف پہلوؤں پر روشنی ڈالی۔ وزیر خزانہ نے کہا کہ نیتی آیوگ کے پائیدار ترقی کے اہداف (ایس  ڈی جی) انڈیا انڈیکس اور ڈیش بورڈ پر ملک کا اسکور مالی سال۲۱-۲۰۲۰ء میں بڑھ کر۶۶؍ ہو گیا ہے۔پیر کو پارلیمنٹ میں اقتصادی سروے۲۲۔۲۰۲۱ءپیش کرتے ہوئے وزیر خزانہ نے کہا کہ نیتی آیوگ کے ایس ڈی جی انڈیا انڈیکس اور ڈیش بورڈ پر ہندوستان کا اسکور۱۹۔۲۰۱۸ء میں ۵۷؍ اور۲۰۔۲۰۱۹ء  میں۶۰؍سے بڑھ کر ۲۱۔۲۰۲۰ء  میں۶۶؍ درج کیا گیا۔ یہ عدد پائیدار ترقی کے اہداف کے حصول کی طرف اس کی پیش رفت کی عکاسی کرتا ہے۔انہوں نے ایس ڈی جی کے تحت سماجی، اقتصادی اور ماحولیاتی اہداف کو حاصل کرنے کے تئیں ہندوستان کے عزم کا اعادہ کیا۔  نیتی آیوگ نے ​​اقتصادی سروے میں ایس ڈی جی انڈیا انڈیکس۲۰۲۱ء  پر ریاستوں اور مرکز کے زیر انتظام علاقوں کی کارکردگی کے بارے میں اپنے  تبصرہ میں بتایا کہ۹۹-۶۵؍ اسکور کے ساتھ فرنٹ رنر ریاستوں اور مرکز کے زیر انتظام خطوں کی تعداد ۲۱۔۲۰۲۰ء میں بڑھ کر۲۲؍ ہو گئی ہے۔ جبکہ۲۰۔۲۰۱۹ء  یہ تعداد ۱۰؍ تھی ۔کیرالا  ریاستوں میں اور چندی گڑھ  مرکز کے زیر انتظام  علاقوں میں سر فہرست ہے۔ شمال مشرقی ہندوستان میں۶۴؍ضلع فرنٹ رنرز اور۳۹؍ ڈسٹرکٹ پرفارمرز رہے۔  یہ سروے تیز رفتار اقتصادی ترقی کے ساتھ تحفظ، ماحولیاتی تحفظ اور ماحولیاتی پائیداری کے توازن کی اہمیت کو واضح کرتا ہے۔ یہ بتاتے ہوئے کہ ہندوستان کے جنگلات کے رقبے میں گزشتہ دہائی۲۰۱۰ء اور۲۰۲۰ء کے درمیان نمایاں اضافہ ہوا ہے۔ اوسط سالانہ خالص منافع میں یہ خطہ عالمی سطح پر تیسرے نمبر پر ہے۔ ساتھ ہی۲۰۱۱ء سے ۲۰۲۱ء  کے دوران ہندوستان کے جنگلات میں۳؍ فیصد سے زیادہ کا اضافہ ہوا۔ اس کی بنیادی وجہ انتہائی گھنے جنگلات میں اضافہ تھا جس میں اس عرصے کے دوران۲۰؍فیصد اضافہ ہوا۔ سروے میں وزیر اعظم کے اس اعلان کا اعادہ کیا گیا ہے کہ۲۰۲۲ء تک ہندوستان ایک بار استعمال ہونے والے پلاسٹک کو مرحلہ وار ختم کر دے گا۔ اس معاملے پر عالمی برادری کی جانب سے کارروائی کرنے کی ضرورت کو تسلیم کرتے ہوئے ہندوستان نے۲۰۱۹ء  میں منعقدہ اقوام متحدہ کی ماحولیاتی اسمبلی میں ایک بار استعمال ہونے والی پلاسٹک کی مصنوعات سے آلودگی سے نمٹنے کے لیے ایک قرارداد پاس کی۔ ڈومیسٹک پلاسٹک ویسٹ مینجمنٹ ترمیمی رولز۲۰۲۱ءکو نوٹیفائد کیا گیا جس کا مقصد واحد استعمال پلاسٹک کو مرحلہ وار ختم کرنا ہے۔   پلاسٹک کی پیکیجنگ کے لیے توسیعی پروڈیوسر کی ذمہ داری کے مسودے کے ضابطے کو بھی نوٹیفائڈ کیا گیا۔ یہ قدم پلاسٹک پیکیجنگ فضلہ کی سرکیولر اکنامی  کو مضبوط بنانے، پلاسٹک کے نئے متبادل اور پائیدار پیکیجنگ کی ترقی کی حوصلہ افزائی کیلئے اٹھایا گیا ہے۔سروے میں کہا گیا ہے کہ زمینی وسائل کا انتظام اور تشخیص اس بات کی نشاندہی کرتی ہے کہ ریاستوں اور مرکز کے زیر انتظام  علاقوں کو اپنے زیر زمین پانی کے وسائل کا احتیاط سے انتظام کرنے کی ضرورت ہے۔ تخمینوں سے ہندوستان کے شمال مغربی اور جنوبی حصوں میں زیر زمین پانی کے وسائل کے بے تحاشہ استحصال کا انکشاف ہوا ہے۔ آبی ذخائر کے استعمال کی محتاط منصوبہ بندی پر زور  آبی ذخائر مانسون کے مہینوں میں سب سے زیادہ ہوتے ہیں اور گرمیوں کے مہینوں میں سب سے کم ۔ اس لیے ذخیرہ اندوزی اور آبی ذخائر کے استعمال کی محتاط منصوبہ بندی اور ہم آہنگی  وقت کی ضرورت ہے۔اقتصادی سروے نمامی گنگا مشن کے آغاز کے بعد سے گنگا اور اس کی معاون ندیوں کے ساتھ واقع انتہائی آلودگی پھیلانے والی صنعتوں (جی پی آئی) کی  کارکردگی میں بہتری کو نمایاں کرتا ہے، اس کے تحت بنائے جانے والے سیوریج کے بنیادی ڈھانچے کے منصوبوں کی تعداد بھی نمایاں  ہوتی  ہے۔۲۰۱۷ء میں ۳۹؍ فیصد سے بڑھ کر۲۰۲۰ء میں۸۱؍فیصد فضلہ کے اخراج میں بھی کمی آئی ہے۔ یہ۲۰۱۷ء  میں۳۴۹ء۱۳؍ ایم ایل ڈی سے کم ہوکر۲۰۲۰ء  میں ۲۸۰ء۲۰؍ ایم ایل ڈی ہوگئی۔ ۵ء۲؍فیصد اوسط خردہ مہنگائی کی شرح  رواں مالی سال کی اس مدت میںریکارڈ  کی گئی جو گزشتہ مالی سال کی اسی مدت میں۶ء۶؍فیصد تھیحکومت نے۲۰۲۴ء تک پورے ملک میں ذرات کے ارتکاز میں۲۰۔۳۰؍فیصد کمی کے ہدف کو حاصل کرنے کیلئے نیشنل کلین ایئر پروگرام (این سی اے پی) کا آغاز کیا تھا۔ یہ پروگرام۱۳۲؍ شہروں میں نافذ کیا جا رہا ہے۔ ملک میں مختلف ذرائع سے فضائی آلودگی کو کنٹرول کرنے اور اسے کم کرنے کیلئے کئی دوسرے اقدامات بھی کیے جا رہے ہیں، جن میں گاڑیوں کے اخراج، دھول اور فضلے کو جلانے سے پیدا ہونے والی آلودگی اور محیط ہوا کے معیار کی نگرانی شامل ہے۔ مہنگائی کے اشاریہ میں نرمی آ رہی ہے  پارلیمنٹ میں پیر کو پیش کیے گئے موجودہ مالی سال کے اقتصادی سروے میں کہا گیا ہے کہ۲۲۔۲۰۲۱ء  (اپریل-دسمبر) میں اوسط خردہ  مہنگائی(سی پی آئی -مشترکہ) گزشتہ مالی سال کی اسی مدت میں۶ء۶؍ فیصد سے کم ہو کر۵ء۲؍ فیصد پر آ گئی ہے۔سروے کے مطابق غذائی مہنگائی میں نرمی کے باعث خردہ مہنگائی میں کمی آئی ہے۔سروے میں کہا گیا ہے کہ غذائی مہنگائی۲۲۔۲۰۲۱ء (اپریل تا دسمبر) میں اوسطاً کم۲ء۹؍ فیصد کی نچلی سطح پر رہی جبکہ گزشتہ برس کی اسی مدت میں یہ۹ء۱؍ فیصد تھی۔اس میں کہا گیا ہے کہ سپلائی -فریق  کا انتظام کرکے حکومت نے رواں مالی سال کے دوران بیشتر ضروری اشیاء کی قیمتوں کو کنٹرول میں رکھا۔ دالوں اور خوردنی تیل کی قیمتوں میں اضافے کو روکنے کے لیے فعال اقدامات کیے گئے۔واضح رہےکہ پیر کو پارلیمنٹ میں پیش کردہ اقتصادی جائزے میں اگلے مالی سال۲۳۔۲۰۲۲ء  کے دوران ۸ء۰؍ سے۸ء۵؍ فیصد کی اقتصادی ترقی کا تخمینہ لگایا گیا ہے اور ملک کی معاشی صورتحال  گزشتہ دو برسوں میں بہتر رہنے کا امکان ظاہرکیا گیا ہے ۔معاشی سروے میںبتایاگیا ہےکہ سیر وسیاحت ، ہوٹل  اور کاروباری سیکٹراب تک کووڈ سے پوری طرح  ابھر نہیںسکے ہیںلیکن یہ بتدریح بحالی کی طرف گامزن ہیں۔