محبوبہ مفتی نے کشمیر انتظامیہ کو آڑے ہاتھوں لیا، صحافیوں کو پریشان کرنے کا الزام عائد کیا

Updated: September 28, 2021, 7:31 AM IST | kashmir

پی ڈی پی سربراہ نے پریس کونسل آف انڈیا اور ایڈیٹرس گلڈ آف انڈیا کو ایک مکتوب روانہ کرتے ہوئے لکھا ہے کہ مقامی صحافیوں کو سچ بولنے کی سزا دی جارہی ہے

 پی ڈی پی صدرا ور ریاست کی سابق وزیر اعلیٰ محبوبہ مفتی نے کشمیر انتظامیہ کو آڑے ہاتھوں لیتے ہوئے اس پر سچ بولنے والے صحافیوں کو پریشان کرنے کاالزام عائد کیا۔ انہوں نے کہا کہ ایک طرف ریاست میں نارملسی کے بیانیے کو پیش کرنے کیلئے یہاں’ لچکدار‘ صحافیوں کو باہر سے لایا جا رہا ہے جبکہ دوسری طرف مقامی صحافیوں کو حق بولنے کے پاداش میں سزا دی جا رہی ہے۔ انہوں نے کہا کہ میں نے جموں کشمیر میں میڈیا کو مسلسل ستائے جانے کے بارے میں ایڈیٹرس گلڈ آف انڈیا کو ایک مکتوب روانہ کیا ہے۔ انہوں نے ان باتوں کی جانکاری پیر کو اپنے ایک ٹویٹ کے ذریعے فراہم کی ہے۔
  اس ٹویٹ میں انہوں نے لکھا کہ اس تعلق سے `میں نے جموں کشمیر میں میڈیا کو مسلسل ستائے جانے کے بارے میں ایڈیٹرس گلڈ آف انڈیا کو ایک مکتوب روانہ کیا ہے۔ انہوں نے الزام عائد کیا کہ یہاں پر حکومت نواز صحافیوں کو لا کر ان سے اپنی پسند کی خبریں تیار کروائی جارہی ہیں اور یہ بتانے کی کوشش کی جارہی ہے کہ ریاست میں سب کچھ نارمل ہے۔ اس خط میں انہوں نے یہ بھی لکھا ہے کہ  ایک طرف جہاں یہ ہورہا ہے، وہیں دوسری طرف مقامی صحافیوں کو، جو انتہائی دباؤ میں کام کرتے ہیں،  اقتدار کے سامنے سچ بولنے کے پاداش میں سزا بھی دی جا رہی ہے۔اس سے قبل پی ڈی پی کے آفیشل ٹویٹر ہینڈل پر اس سے متعلق  ایک ٹویٹ کیا گیا تھا، جس  میں اطلاع دی گئی تھی کہ’’ `پی ڈی پی صدرمحبوبہ مفتی نے پریس کونسل آف انڈیا اور ایڈیٹرس گلڈ آف انڈیا کو ایک مکتوب روانہ کیا ہے جس میں کشمیر میں صحافیوں کی منظم ایذا رسانی کے معاملے کو اٹھایا گیا ہے۔‘‘ٹویٹر ہینڈل پر انگریزی زبان میں تحریر مذکورہ مکتوب کے متن کو بھی اپ لوڈ کیا گیا ہے۔