امریکہ کا ویزہ کی فیس میں اضافے کا فیصلہ، طلبہ کو پریشانی کا خدشہ

Updated: February 02, 2022, 11:24 AM IST | Agency | Washington

جوبائیڈن نے امیگرینٹ ویزوں کی فیس بڑھانے کی تجویز ، ۲۸؍ فروری تک حتمی فیصلہ ممکن، منظوری کی صورت میں ستمبر سے نئی فیس نافذ

 امریکی صدر جو بائیڈن نے  تقریباً تمام نان امیگرینٹ ویزوں کی فیسوں میں اضافے کی تجویز پیش کی ہے۔ امریکی حکام کا کہنا ہے یہ اضافہ ویزے کی خدمات کو بہتر کرنے کیلئے ناگزیر ہے، جبکہ ناقدین فکر مند ہیں کہ اگرحکومت ویزوں کےاجرا میں لگنے والے وقت کو کم کرنے کیلئے اقدامات نہیں کرتی تو فیسوں میں اس اضافے کے نتیجے میں امریکہ آنے والے مسافروں اور طالب علموں کی تعداد میں کمی ہوجائے گی۔ فیڈرل رجسٹر نوٹس کے مطابق محکمہ خارجہ کو توقع ہے کہ نئی فیس ستمبر تک لاگو ہوجائیں گی اور فیس کے اضافے کی تجویز پروضاحت ۲۸؍  فروری تک وصول کی جائے گی۔کاٹو انسٹی ٹیوٹ میں امیگریشن پالیسی کے ماہر ڈیوڈ بائر نے کو بتایا کہ فیس میں یہ اضافہ ایسے وقت میں کیا جارہا ہے جب امریکہ میں سیاحت اور سفر پہلے ہی بہت کم سطح پر ہے اور محکمہ خارجہ بہت سے مقامات پر سیاحت اور تجارت کے   ویز وں کی درخواست کے بعد انتظار کی مدت ۶؍ماہ سے ایک سال کر رہا ہے۔ محکمہ خارجہ کے اعداد وشمارسے  ظاہر ہوتا ہے کہ زیادہ تر ویزہ درخواست سیاحت، تجارت اور تعلیم کیلئے دی جاتی ہے۔نان امیگرینٹ ویزہ کچھ شرائط کے ساتھ امریکہ میں سیاحت یا قیام، کام کرنے یا تعلیم حاصل کرنے کی اجازت دیتا ہے۔ سیاحت کے ویزہ کی درخواست بی ون، بی ٹو اور اسٹوڈنٹ ویزہ ایف ، ایم ، جے کی فیس ۱۶۰؍ ڈالر سے بڑھا کر ۲۴۵؍ ڈالر کردی گئی ہیں، جو کہ  ۵۴؍ فیصد اضافہ ہے؛ جبکہ روزگار پر مبنی ویزہ ایچ، ایل ، او ، پی ، کیو اور آر کی فیس ۱۹۰؍ سے بڑھا کر ۳۱۰؍ کردی گئی ہیں جو کہ۶۳؍ فیصد اضافہ  ہے۔  بائر مزید کہتے ہیں کہ سب سے اہم بات یہ کہ کیا ویزے فوری طور جاری کئےجائیں گے۔ اگر انتظامیہ فیس میں اضافہ کرتا ہے لیکن ویزہ سروس میں محکمہ خارجہ کی جانب سے کوئی بہتری نہیں آتی تونتیجے میں مسافروں میں کمی واقع ہو گی۔حالیہ برسوں کے دوران امریکی ہوائی اڈوں پر ملکی اور بین الااقوامی دونوں طرح کے مسافروں کی تعداد میں کمی واقع ہوئی ہے۔ ٹرانسپورٹیشن سوسائٹی ایڈمنسٹریشن کے مطابق انہوں  نے ۲۶؍ جنوری کو کل ۱۱؍ لاکھ لوگوں کی اسکریننگ کی ، اسی دن ۲۰۱۹ءمیں کرونا کی وبا سے پہلے یہ تعداد بیس لاکھ تھی۔