اداکارہ سشمتا سین نے اسپتال کے سی ای او کوروتا دیکھ کرآکسیجن کی پیشکش کی

Updated: April 28, 2021, 12:12 PM IST | Agency | Mumbai

دہلی کے شانتی مکند اسپتال کے سی ای او سنیل ساگر نے ایک ویڈیو میں اسپتال میں آکسیجن کی کمی کا حوالہ د یا جس پر سشمتا سین نے انہیں مدد کا یقین دلایا

سشمتا سین۔تصویر :آئی این این

کورونا وائرس  وبا کےسبب  حالات دن بہ دن بد سے بدترہوتے جارہے ہیں۔ وبا کی زد میں آرہے مریضوں کو آکسیجن کی کمی کی پریشانی کافی سامنے آرہی ہے۔ایسے میں ملک کے الگ الگ حصوں میں آکسیجن سلنڈر کی کمی بھی دیکھنے کو مل رہی ہے۔ حالات یہ ہیں کہ ڈاکٹرس بھی اب ہمت ہارنے لگے ہیں۔ اب حال ہی میں دہلی کے شانتی مکند اسپتال کے سی ای او سنیل ساگر کا ایک ویڈیو سوشل میڈیا پر سامنے آیا  ہے جس میں سنیل ساگر اسپتال میں آکسیجن کی کمی  کا حوالہ دیتے  ہوئےپریشان نظر آرہے ہیں ۔ یہ ویڈیو دیکھنے کے بعد بالی ووڈ اداکارہ سشمتا سین بھی کافی دکھی ہو گئیں۔
 سشمتا سین نے سنیل ساگر کا  ویڈیو دیکھنے کے بعد ان کی مدد کی پیشکش کرتے ہوئے  آکسیجن بھیجنے کی خواہش کا اظہار کیا ہے۔ سنیل ساگر کی ویڈیو پر ردعمل ظاہر کرتے ہوئے سشمتا سین نے لکھا- `یہ گہری اور دل دہلا دینے والی ہے۔ ہر طرف آکسیجن کا بحران ہے۔ میں نے اس اسپتال کے لئے آکسیجن کے کچھ سلنڈروںکا بندوبست   کرنے میں کامیابی حاصل کی ہے لیکن ممبئی سے دہلی تک لے جانے کا کوئی طریقہ نہیں ہے ۔ براہ کرم کوئی راہ سجھانے میں  میری مدد کریں۔ `
  اپنی مدد کی پیشکش پرسشمتا سین خود ہی ٹرولرس کے نشانے پر آگئی ہیں۔ کئی یوزرس نے اداکارہ کے پوسٹ پر تبصرہ کرتے ہوئےسوال کیا کہ ممبئی میں بھی آکسیجن کی کمی  ہے تو وہ دہلی سلنڈر کیوں بھیجنا چاہتی ہیں لیکن سشمتا یوزر کے اس سوال پر خاموش نہیں رہیں۔ انہوں نے اس کا  مناسب جواب بھی دیا۔سشمتا نے کہاکہ’’ کیونکہ مجھے پتہ چلا ہے کہ ممبئی میں ابھی بھی آکسیجن سلنڈرز ہیں۔ فی الحال دہلی کو ان سلنڈرز کی  زیادہ ضرورت ہے۔ خاص کر چھوٹے اسپتالوں کو اس لئے اگر مدد کر سکتے ہیں تو کریئے۔