بنگال کے مسلمان ممتا بنرجی کی جاگیر نہیں ہیں: اویسی

Updated: December 17, 2020, 12:00 PM IST | Agency | Kolkata

ممتا بنرجی نے ایک جلسے میں کہا تھا کہ بی جے پی کروڑوں روپے خرچ کرکے حیدرآباد کی ایک پارٹی کو آئندہ اسمبلی انتخابات میں کھڑا کرنے کی کوشش کررہی ہے جس کااویسی نے جواب دیا ہے

اسدالدین اویسی اور ممتا بنرجی ۔ تصویر : آئی این این

مغربی بنگال کی وزیر اعلیٰ ممتا بنرجی کی مجلس اتحاد المسلمین پر تنقید اور اسے بی جے پی کی بی ٹیم قرار دیئے جانے کے بعد اسد الدین اویسی نے  انہیں جواب دیتے ہوئے کہا ہے کہ بنگال کے مسلمان ممتا بنرجی کی جاگیر نہیں ہیں ۔ ممتا بنرجی نے ایک جلسے میں کہا تھا کہ بی جے پی کروڑوں روپے خرچ کرکے حیدرآباد کی ایک پارٹی کو آئندہ اسمبلی انتخابات میں کھڑا کرنے کی کوشش کررہی ہے۔اویسی نے ٹویٹ کرتے ہوئے لکھا  کہ وہ مسلمان جو اپنے لئے سوچتے اور بولتے ہیں ممتا بنرجی انہیں پسند نہیں کرتیں۔ ترنمول کانگریس کی سپریموکے الزامات کا جواب دیتے ہوئے اویسی نے لکھا ہے کہ کوئی بھی انہیں پیسے سے نہیں خرید سکتا ۔
  آل انڈیا مجلس اتحاد المسلمین کے صدر نے ٹویٹ کیا کہ’’ اب تک آپ نے صرف فرمانبردار میر جعفرز اور صادقوں کے ساتھ ہی معاملہ کیا ہے۔ آپ ان مسلمانوں کو پسند نہیں کرتے جو خود سوچتے ہو اور بات کرتے ہیں۔اویسی نے لکھا ہے کہ خود آپ اپنے لوگوں کے بکھرنے سے خوف زدہ ہیں ۔آپ کے لوگ بی جے پی میں جارہے ہیں اس لئے آپ بے چین ہیں۔اویسی نے الزام لگایا کہ ترنمول کانگریس کے لیڈرنے بہار کے لوگوں کی توہین کی ہے جنہوں نے اے ایم آئی ایم کو ووٹ دیا۔اویسی نے کہا کہ نام نہاد سیاسی جماعتیں بی جے پی سے شکست کےلئے ہمیں مورد الزام ٹھہرارہے ہیں ۔اپنی ناکامیوں کےلئے مجھے کیسے ذمہ دار ٹھہراسکتے ہیں ۔