نیوزی لینڈ میں زلزلے کے شدید جھٹکے ، سونامی الرٹ

Updated: March 06, 2021, 12:22 PM IST | Agency | Auckland

نیوزی لینڈ کے دو مرکزی جزیروں سے ۱۰۰؍ کلو میٹر کے فاصلے پر کرمادک جزیرے میں ریکٹر اسکیل پر ۸ء۱؍شدت کا زلزلہ محسوس کیا گیا۔ جب کہ یکے بعد دیگرے شدید زلزلے کے جھٹکے محسوس کئے گئے۔

نیوزی لینڈ کے دو مرکزی جزیروں سے ۱۰۰؍ کلو میٹر کے فاصلے پر کرمادک جزیرے میں ریکٹر اسکیل پر ۸ء۱؍شدت کا زلزلہ محسوس کیا گیا۔ جب کہ یکے بعد دیگرے شدید زلزلے کے جھٹکے محسوس کئے گئے۔جنوبی بحرالکاہل میں حالیہ تاریخ کے شدید ترین زلزلے کے بعد سمندر میں سونامی کا اندیشہ ظاہر کیا گیا تھا جس کے بعد نیوزی لینڈ میں ہزاروں افراد جمعہ کو ساحلی علاقے خالی کرنے پر مجبور ہوئے۔زلزلے کے جھٹکوں کا یہ سلسلہ کئی گھنٹوں تک جاری رہا۔ شدید زلزلہ آنے سے قبل ۷ء۴؍ اور ۷ء۳؍ شدت کے دو زلزلے بھی ریکارڈ کئےگئے تھے۔امریکہ کے جیولوجیکل سروے نے بتایا کہ شدید ترین زلزے کا مرکز کرمادک کے جزیرے کے نزدیک تھا اور اس کی زمین کے اندر گہرائی ۱۹؍ کلو میٹر تھی۔سول ڈیفنس کے محکمے نے بعض ساحلی علاقوں میں شہریوں کو بتایا کہ وہ فوری طور پر کسی بلند مقام کی طرف چلے جائیں کیونکہ ایک شدید سونامی کا امکان ہو سکتا ہے۔ سمندر کی لہر یں ۱۰؍ فٹ تک بلند ہو سکتی ہیں۔ایمرجنسی مینجمنٹ کی وزیر کری الان نے صحافیوں کو بتایا کہ تمام لوگوں نے ہدایات پر عمل کیا ہے۔
 سونامی کے خطرے کے سبب نیوزی لینڈ میں شاہراہوں پر ٹریفک جام ہو گیا ج کہ شہریوں میں بھی شدید خوف و ہراس پھیل گیا۔ کئی علاقوں کے لوگ بلند مقامات پر پہنچنے کیلئے گھروں نے نکل کھڑے ہوئے۔ساحلی علاقوں میں موجود شہریوں نے مختلف مقامات پر سمندر کی لہروں میں شدت آنے کے ویڈیو  بھی بنائے۔بعد ازاں نیوزی لینڈ میں آفات سے نمٹنے کے قومی ادارے نے بتایا کہ سونامی کا خطرہ ٹل گیا ہے۔ لوگ اپنے گھروں اور علاقوں میں واپس جا سکتے ہیں۔ تاہم ان کو ساحل سمندر پر جانے سے گریز کرنا چاہئے۔زلزلے کے ابتدائی جھٹکوں کا مرکز نیوزی لینڈ کے بہت قریب تھا جس کے سبب بہت سے لوگ خوف زدہ ہو کر گھروں سے نکل آئے۔ نیوزی لینڈ کی وزیرِ اعظم جیسنڈا آڈرن نے فیس بک پر لکھا کہ امید ہے کہ سب لوگ خیریت سے ہیں۔پیسیفک سونامی وارننگ سینٹر نے خبردار کیا تھا کہ زلزلہ وانوتو میں تین میٹر تک جبکہ ٹونگا میں ایک میٹر بلندی رکھنے والی سونامی لہروں کو جنم دے سکتا ہے۔بحرالکاہل کے جزائر اور لاطینی امریکہ میں بھی ساحلی علاقوں میں سونامی کے حوالے سے خبردار کیا گیا تھا۔جنوبی امریکہ کے ملک چلی میں حکام نے سونامی کے خطرے کے سبب لوگوں کو ساحلِ سمندر سے دور جانے کے احکامات جاری کئے۔گوئٹے مالا نے بھی سونامی الرٹ جاری کیا۔ جبکہ ایل سلوا ڈور میں لوگوں کو تفریحی سرگرمیوں میں احتیاط کی ہدایت جاری کی گئی ہے۔میکسیکو کا کہنا تھا کہ ان کے ہاں کسی طرح کا خطرہ نہیں ہے۔نیوزی لینڈ کے جزیرے گزبورن اور آسٹریلیا کے ایک جزیرے میں ۳۰؍ سینٹی میٹر تک بلند لہریں ریکارڈ کی گئیں۔