کانگریس کا وعدہ :حکومت سازی کے ۱۰؍دن کے اندر کسانوں کا قرض معاف ہو گا

Updated: February 10, 2022, 10:33 AM IST | Lucknow

یوپی کانگریس کی انچارج پرینکا گاندھی نےپارٹی کے انتخابی منشور کا تیسرا حصہ جاری کیا ، خواتین کوملازمتوں میں ۴۰؍ فیصد ریزرویشن دینے کا بھی وعدہ

کانگریس نے اترپردیش اسمبلی انتخابات کیلئے اپنے انتخابی منشور’انتی ودھان جن گھوشنا پتر‘ کا تیسرا حصہ بھی جاری کردیا ہے جس میں سب سے بڑا وعدہ  کسانوں کے قرض کے تعلق سے کیا گیا ہے۔ کانگریس نے وعدہ کیا ہے کہ حکومت بننے پر ۱۰؍دنوں کے اندر کسانوں کا پورا قرض معاف کردیا جائے گا۔ ساتھ ہی   ملازمتوں میں خواتین کو ۴۰؍فیصد ریزرویشن دیا جائے گا۔ کانگریس جنرل سیکریٹری پرینکا گاندھی   نے  ریاستی کانگریس دفتر میں منشور جاری کرتے ہوئے یوپی کے عوام سے کانگریس کو ہی منتخب کرنے کی اپیل کی ۔ اس موقع پر کانگریس کے ریاستی صدر اجئے کمار للو اور سابق ریاستی صدر سلمان خورشید سمیت دیگر لیڈر موجود تھے ۔
  پرینکا گاندھی نے کہا کہ جس طرح سے چھتیس گڑھ میں حکومت بننے کے تین گھنٹوں کے اندر کسانوں کا قرض معاف کیا گیا تھا اسی طرح اترپردیش میں بھی قرض معافی کی جائے گی۔  کانگریس کا دوسرا بڑا اعلان  یوپی میں ۲۰؍ لاکھ روزگار دینے کا ہے۔ انہوں نے کہا کہ اترپردیش میں  فی الحال ۱۲؍لاکھ سرکاری اسامیاں خالی ہیں۔ ان اسامیوں کو پُر کر کے ۸؍ لاکھ  ملازمتوں کے اضافی مواقع پیدا کئے جائیں گے۔ انہوں نے کہا کہ کانگریس نے تین     ودھان پتر(انتی ودھان، شکتی ودھان اور بھرتی ودھان)کے طور پر اپنا انتخابی منشور جاری کیا ہے جو یہ واضح کرتا ہے کہ یوپی کے عوام کے تئیں کانگریس نے پوری تیار ی اور ایک ویژن کے ساتھ انتخاب لڑنے کا فیصلہ کیا ہے۔  
 پرینکا گاندھی کے مطابق کانگریس لیڈروں نے پورے صوبے میں  جگہ جگہ دورہ کرکے عوام کے مسائل کی نشاندہی کی ہے اور اسی کی بنیاد پر  یہ منشور تیار کیاگیا  ہے۔ یہ عوام کی آواز کو اجاگر کرتا ہے۔انہوں نے کہا کسانوں کی قرض معافی، نوکریوں میں خواتین کو ریزرویشن اور۲۰؍لاکھ روزگار کے علاوہ کسانوں کو آوارہ مویشیوں کے مسائل سے نجات دینے کے بھی پختہ انتظامات کئے جائیں گے۔ کانگریس جنرل سیکریٹری نے کہا کہ اس کیلئے چھتیس گڑھ کی طرز پر یوپی میں آوارہ مویشیوں کے مسائل سے کسانوں کو نجات دلانے کے لئے’گودھن اسکیم‘ کا آغاز کیا جائے گا ۔