بھوپیندرحکومت میں۲۴؍ وزراء نے حلف لیا ’نو رِپیٹ‘ فارمولہ کے تحت ایک بھی پرانے چہرے کو جگہ نہیں

Updated: September 17, 2021, 9:20 AM IST | Gandhi Nagar

راج بھون میں منعقدہ تقریب میں وزراء کو گورنر آچاریہ دیوورت نے عہدے اور رازداری کا حلف دلایا،پچھلی بار کے برعکس ، اس بار کوئی نائب وزیراعلیٰ نہیں ہے اور کابینہ میں ذات اور علاقائی توازن قائم کرنے کی کوشش بھی کی گئی ہے

گجرات میں  وزیراعلیٰ کی تبدیلی کے بعد نئی بننے والی بھوپیندر پٹیل حکومت کے وزراء کی تقریب حلف برداری جمعرات کو یہاں راج بھون میں منعقد ہوئی جس میں ۱۰؍کابینہ کی سطح سمیت۲۴؍ وزراء کو گورنر آچاریہ دیوورت نے عہدے اور رازداری کا حلف لیا۔
 بی جے پی نے ’نو رپیٹ‘ یعنی سابقہ  ​​حکومت کے کسی وزیر کو دوبارہ وزیر کا عہدہ نہ دینے کے فارموے کے تحت    وجے روپانی حکومت کے کسی بھی وزیر کو بھوپیندر پٹیل حکومت کی کابینہ  میں جگہ نہیں دی گئی ہے ۔ تمام وزراء نئے ہیں۔ پچھلی بار کے برعکس ، اس بار کوئی نائب وزیراعلی نہیں ہے اور کابینہ میں ذات اور علاقائی توازن  قائم کرنے کی کوشش  بھی کی گئی ہے۔ ماضی میں کانگریس سے  بغاوت کرکے بی جے پی میں شامل ہونے والے چہروں کو بھی وزیر کا عہدہ دیا گیا ہے۔ پچھلی حکومت میں صرف ایک خاتون وزیر تھی جبکہ اس بار دو خواتین کو وزیر بنایا گیا ہے۔ دونوں وزیر مملکت ہیں۔
 راج بھون میں دوپہر ڈیڑھ بجے منعقدہ تقریب میں جمعرات کو ہی قانون ساز اسمبلی کے اسپیکر کے عہدے سے استعفیٰ دینے والے راجندر تریویدی (اسمبلی حلقہ راؤپورہ) کے ساتھ  ہی  پہلے اجتماعی طور پر کابینہ سطح کے وزیر کے طور پر حلف لینے والے دیگر وزیروں میں جتیندر ودھانی ، رشی کیش پٹیل، پرنیش مودی، راگھو جی بھائی پٹیل شامل تھے۔ 
  حلف لینے والے پانچ دیگر کابینی وزیروں میںکنو دیسائی، ارجن چوہان، پردیپ پرمار، نریش پٹیل اور کیراٹ رانا شامل  ہیں۔
 ۱۰؍ کابینی وزراء کے علاوہ کل۱۴؍ وزرائے مملکت نے بھی حلف لیا جن میں ۵؍ آزاد انہ چارج والے  ہیں۔ وزیر مملکت (آزادانہ چارج) کے طور پر حلف اٹھانے والوں میں ہرش سنگھوی ، جگدیش پنچال ، برجیش میرجا ، جیتو چودھری  اور منیش وکیل شامل  ہیں۔ 
 گزشتہ وجے روپانی حکومت میں ایک نائب وزیر اعلیٰ کے علاوہ۱۰؍ دیگر کابینی کے وزراء اور۱۱؍ وزرائے مملکت شامل تھے۔ اس میں صرف ایک خاتون وزیر تھیں۔
   کابینہ کا پہلا اجلاس جمعہ کی شام ہوگا اور وزراء کے قلمدان مختص کیے جائیں گے۔
 تقریب حلف برداری میں اسٹیج پر موجودہ وزیراعلیٰ بھوپندر پٹیل کے علاوہ سابق وزیر اعلیٰ  روپانی ،’ناراض‘ بتائے جارہے سابق نائب وزیر اعلیٰ نتن پٹیل ،مرکزی وزیر  اور  گجرات بی جے پی انچارج بھوپیندر یادو ، پارٹی کے جنرل سیکریٹری بی ایل سنتوش ، ریاستی صدر سی آر پاٹل بھی موجود تھے۔