عالمی شہرت یافتہ مکے باز مائک ٹائیسن ،کرن جوہر کی فلم میں نظر آئیں گے

Updated: November 08, 2021, 2:10 PM IST | Agency | Mumbai

خبریں ہیں کہ سابق امریکی ہیوی ویٹ چمپئن باکسر و ریسلر مائک ٹائیسن جلد ہی پہلی بالی ووڈ فلم میں ہندوستانی ہیرو کو باکسنگ کا مزہ چکھاتے دکھائی دیں گے۔

فلم کے پوسٹر میں مائک ٹائیسن کا انداز تصویر: آئی این این

 خبریں ہیں کہ سابق امریکی ہیوی ویٹ چمپئن باکسر و ریسلر مائک ٹائیسن جلد ہی پہلی بالی ووڈ فلم میں ہندوستانی ہیرو کو باکسنگ کا مزہ چکھاتے دکھائی دیں گے۔فلم ساز کرن جوہر کے پروڈکشن ہائوس ’دھرما پروڈکشنز‘ کی جانب سے کئے گئے ٹوئٹ میں مائک ٹائیسن کی گھونسہ مارنے کی تصویر شیئر کرتے ہوئے تصدیق کی گئی کہ امریکی باکسر بھی آنے والی فلم ’لگر‘ کا حصہ ہیں۔پروڈکشن ہاؤس کی جانب سے باکسر کی فلم کی پہلی جھلک انسٹاگرام پر بھی شیئر کی گئی، جس میں مائک ٹائیسن کو جارحانہ انداز میں گھونسہ مارتے دکھایا گیا ہے۔ اسی پوسٹر کو خود امریکی باکسر نے بھی اپنے سوشل میڈیا اکاؤنٹس پر شیئر کیا اوربالی ووڈفلم کا حصہ بننے پر خوشی کا اظہار کیا۔ اسی حوالے سے ’انڈین ایکسپریس‘نےبتایا کہ مائک ٹائیسن کرن جوہر کی پروڈیوس کردہ فلم ’لگر‘ کا حصہ ہوں گے جس میں وجے دیوراکونڈا مرکزی کردار میں دکھائی دیں گے۔مذکورہ فلم میں بالی ووڈ اداکارہ اننیا پانڈے بھی شامل ہیں اور امکان ہے کہ فلم کو بیک وقت تمل، تیلگو اور ہندی زبان میں ریلیز کیا جائے گا۔ ’لگر‘ کی کہانی باکسنگ، ریسلنگ اور آرٹ مارشل کے گرد گھومتی ہے، جس میں ممکنہ طور پر مائک ٹائیسن اور وجے دیوراکونڈا کی فائیٹ دکھائی جائے گی۔’لگر‘ کی ہدایت کاری پوری جگناتھ کریں گے جب کہ اسے کرن جوہر کی پروڈکشن کمپنی کے بینر تلے ریلیز کیا جائے گا۔ فلم کے مرکزی اداکار وجے دیوراکونڈا نے رواں برس ستمبر میں ہی مائک ٹائیسن کی باکسنگ فائٹ کا کلپ ٹوئٹر پر شیئر کرتے ہوئے بتایا تھا کہ پہلی بار کسی بالی ووڈ فلم میں امریکی باکسر کو کاسٹ کیا جائے گا۔ خیال کیا جا رہا ہے کہ فلم میں مائک ٹائیسن کا وجے دیوراکنڈا سے باکسنگ مقابلہ کروایا جائے گا مگر اس حوالے سے فلم کی ٹیم نے کوئی وضاحت جاری نہیں کی۔مائک ٹائیسن سے قبل بعض امریکی، چینی و کوریائی باکسرزاور ریسلرز کو بالی ووڈ فلموں میں دکھایا جا چکا ہے، تاہم پہلا موقع ہوگا کہ باکسنگ کے سابق چمپئن کو حقیقی طور پر دکھایا جائے گا۔ابھی واضح نہیں ہے کہ ’لگر‘ کو کب تک ریلیز کیا جائے گا، تاہم امکان ہے کہ اسے آئندہ برس وسط تک جاری کیا جائے گا۔