آج انڈین پریمیرلیگ کی میگانیلامی کاپہلادن،فرنچائزیز ۵۹۰؍کھلاڑیوں پرداؤکھیلیں گی

Updated: February 12, 2022, 1:08 PM IST | Agency | New Delhi

غیرملکی کھلاڑیوں میں سب سے زیادہ۴۷؍ کھلاڑی آسٹریلیا سے ہیں، جب کہ ویسٹ انڈیز کے ۳۴، جنوبی افریقہ کے۳۳، انگلینڈ اور نیوزی لینڈ کے۲۴؍کھلاڑی ہیں

علامتی تصویر۔ تصویر :آئی این این

بنگلور میں۱۲؍ اور۱۳؍ فروری کو ہونے والی ۲؍ روزہ میگا نیلامی میں کل ۵۹۰؍ کھلاڑیوں کی نیلامی ہوگی۔ نیلامی کیلئے رجسٹرڈ۵۹۰؍کھلاڑیوں میں سے۲۲۸؍کیپڈ، ۳۵۵؍ان کیپڈ اور ۷؍ اسوسی ایٹ نیشنز کھلاڑی ہیں۔ روی چندرن اشون، ٹرینٹ بولٹ، پیٹ کمنس، کوئنٹن ڈی کاک، شکھر دھون، فاف ڈو پلیسس، شریس ایّر، کگیسو ربادا، محمد سمیع اور ڈیوڈ وارنر  بڑی نیلامی کی شروعات کرنے والے مارکی سیٹ کا حصہ ہوں گے ۔  مارکی کھلاڑیوں کے بعد، نیلامی کیپڈ پلیئرس اور ان کیپڈ پلیئرس کی فہرست کے ساتھ آگے بڑھے گی۔ خصوصیات کی ترتیب یہ ہوگی: بلے باز، آل راؤنڈر، وکٹ کیپر بلے باز، تیز گیند باز اور اسپن گیندباز۔ پہلے مرحلے میں ایسے کئی نام ہیں جو اس نیلامی میں مہنگے ترین کھلاڑی بن سکتے ہیں۔ ان میں ہندوستانی وکٹ کیپر بلے باز ایشان کشن بھی شامل ہیں جنہوں نے دونوں نئی ​​ٹیموں لکھنؤ سپر جائنٹس اور احمد آباد ٹائٹنس کی تجاویز کے باوجود نیلامی میں حصہ لینے کا فیصلہ کیا تھا۔ 
 کشن کے علاوہ کیپڈ کھلاڑیوں کے پہلے مرحلے میں گزشتہ سیزن میں سب سے زیادہ وکٹ  لینے والے ہرشل پٹیل، ٹی ۲۰؍ ورلڈ کپ کے فائنل میں پلیئر آف دی میچ رہنے والے آل راؤنڈر مشیل  مارش، ویسٹ انڈیز کی محدود اوورس ٹیم کے نائب کپتان نکولس پورن، نوجوان سلامی بلے بازدیودت پڈیکل اورویسٹ انڈیز کیلئے ہیٹ ٹرک لینے والے پہلے کھلاڑی بنے جیسن ہولڈر بھی شامل ہیں۔ پہلے مرحلے میں دنیش کارتک، ڈوین براوو اور سریش رائنا کی شکل میں تجربہ کار کھلاڑی بھی موجود ہیں۔
 انڈر۱۹؍ ورلڈ کپ میں سب کو متاثر کرنے والے ڈی بریوس مستقبل کیلئے ایک اچھا متبادل  ثابت ہو سکتے ہیں۔۱۸؍ سالہ ڈی  بریوس ایک اور کھلاڑی ہے جس پر سب کی نظریں ہوں گی۔ انڈر ۱۹؍ ورلڈ کپ میں جنوبی افریقہ کی نمائندگی کرتے ہوئے بریوس نے اپنی کارکردگی سے سب کو متاثر کیا۔ اے بی ڈی ویلیئرس کا اپنا آئیڈیل ماننے والے بریوس نے کئی فرنچائزیز کی توجہ مبذول کروائی ہے جنہوں نے بتایا ہے کہ ان کی شاندارتکنیک انہیں مستقبل کیلئے ایک اچھا متبادل بناتی ہے۔ ویسٹ انڈیز کے آل راؤنڈر اوڈین اسمتھ نے اپنی بنیادی قیمت کو کم کرکے ایک کروڑکردیا ہے۔ اس سے قبل اوڈین ۲؍ کروڑ کی بیس پرائز کے ساتھ نیلامی کی بڑی فہرست میں اپنا نام درج کروایا تھا۔۲۵؍ سالہ اوڈین نے کیریبین پریمیر لیگ، ٹی۱۰؍ لیگ اور ٹی۲۰؍ انٹرنیشنل کرکٹ میں مضبوط پرفارمنس سے اپنی پہچان بنائی تھی۔ گزشتہ سیزن میں وہ نیٹ گیندباز کے طورپر کولکاتا نائٹ رائیڈرس کے ساتھ شامل تھے۔ حال ہی میں ویسٹ انڈیز کے خلاف ٹی  ۲۰؍ انٹرنیشنل سیریز کیلئے ریزرو کھلاڑی کے طور پر ہندوستانی ٹیم میں شامل کئے جانے والے  تیز رفتار بلے باز  شاہ رخ خان کانام انکیپڈ کھلاڑیوں کی پہلی فہرست میں آئے گا۔  وہ ان کیپڈ زمرے  میں سب سے مہنگے کھلاڑی بن سکتے ہیں۔
  اپنی پچھلی فرنچائزی پنجاب کنگز سے ایک معاہدے کو خارج کرنے کے بعد شاہ رخ نے اپنی بنیادی قیمت ۲۰؍لاکھ روپے سے بڑھا کر ۴۰؍ لاکھ روپے کر دی ہے۔ شاہ رخ نے اس سیزن  کے فائنل میں آخری گیند پر چھکا لگا کر تمل ناڈو کو سید مشتاق علی ٹرافی کا فاتح بنایاتھا اور اس کے بعد وجے ہزارے ٹرافی میں بھی سب کو متاثر کیا۔ نیلامی کیلئے رجسٹرڈ کل ۵۹۰؍ کھلاڑیوں میں سے۳۷۰؍ ہندوستانی اور۲۲۰؍ غیر ملکی کھلاڑی ہیں۔ ان میں سب سے زیادہ۴۷؍ کھلاڑی آسٹریلیا سے ہیں، جب کہ ویسٹ انڈیز کے ۳۴، جنوبی افریقہ کے۳۳، انگلینڈ اور نیوزی لینڈ کے۲۴، سری لنکا کے۲۳، افغانستان کے۱۷، بنگلہ دیش، آئرلینڈ کے ۵۔۵، نامیبیا کے ۳، اسکاٹ لینڈ کے  ۲؍ اور زمبابوے، نیپال اور امریکہ کے ایک ایک کھلاڑی شامل ہیں۔