سنیل گاوسکر ٹیسٹ ڈیبیو کے ۵۰؍سال مکمل کریں گے

Updated: March 05, 2021, 1:08 PM IST | Agency | New Delhi

خراج تحسین:۶؍مارچ۱۹۷۱ء کو لٹل ماسٹر نے ویسٹ انڈیز کے خلاف اپنے ٹیسٹ کریئر کا آغاز کیا تھا

سنیل گاوسکر۔تصویر :آئی این این

کرکٹ کے لیجنڈ اور عظیم ترین  افتتاحی بلے باز سنیل گاوسکر اپنے ٹیسٹ ڈیبیو کے ۵۰؍ سال مکمل کرنے جارہے ہیں۔ ۶؍مارچ کو، گاوسکر کے ٹیسٹ ڈیبیو کو ۵۰؍ سال مکمل ہوں گے۔اوریجنل لٹل ماسٹر گاوسکر نے ۶؍مارچ ۱۹۷۱ءکو پورٹ آف اسپین میں طاقتور ویسٹ انڈیز کے خلاف ٹیسٹ ڈیبیو کیا تھا اور انہوں نے دونوں اننگز میں ۶۵؍اور ناٹ آؤٹ ۶۷؍رنوں کی اننگز کھیلی تھی۔ 
 اپنی پہلی ٹیسٹ سیریز میں سنیل گاوسکر نے ۴؍ میچوں میں ۷۷۴؍ رن بنائے تھے جو آج  بھی کسی ہندوستانی کا ایک ٹیسٹ سیریز میں سب سے زیادہ رنوں کا ریکارڈ ہے۔ انہوں نے اپنے بین الاقوامی کریئر کا آغاز اس سیریز کے دوسرے ٹیسٹ سے کیاتھا۔ انہوں نے پھراگلے ۳؍ ٹیسٹ میچوں میں ۱۱۶؍، ناٹ آؤٹ ۶۴؍، ایک، ناٹ آؤٹ ۱۱۷؍، ۱۲۴؍ اور ۲۲۰؍رن بنائے۔ اس سیریز میں انہوں نے ۴؍ سنچریاں اور ۳؍ نصف سنچریاں اسکور کی تھیں۔ سنیل گاوسکرکے پہلی سیریز کے اس ریکارڈ کے آس پاس خود گاوسکر ہی پہنچ سکے تھے جب انہوں نے ۷۹۔۱۹۷۸ءمیں ویسٹ انڈیز کے خلاف ۶؍ ٹیسٹ میچوں کی ہوم سیریز میں ۷۳۲؍ رن بنائے تھے۔ دیگر کوئی ہندوستانی بلے باز اس ریکارڈ تک نہیں پہنچا ہے۔ گاوسکر کے ٹیسٹ کرکٹ میں سب سے زیادہ رن اور سنچریاں بنانے کے ریکارڈ کوماسٹر بلاسٹر سچن تینڈولکر نے توڑالیکن سچن ایک سیریز میں سب سے زیادہ رنوں کےگاوسکر کے  ریکارڈ کوتوڑ نہیں سکے۔
 ۷۱؍سال کے ہوچکے سنیل گاوسکر نے ٹیسٹ کرکٹ میں سب سے پہلے ۱۰؍ ہزار رن مکمل کئے تھےاور صدی کے عظیم ترین بلے باز آسٹریلیاکے سر ڈان بریڈمین کا  ۲۹؍سنچریوں کا ریکارڈ توڑا تھا۔ گاوسکر ٹیسٹ تاریخ میں بہترین سلامی بلے بازوں میں سے ایک مانے جاتے ہیں اور  وہ ۷۰ء اور ۸۰ءکی دہائی میں ہندوستانی بیٹنگ میں ریڑھ کی ہڈی کی حیثیت رکھتے تھے۔ اپنے ۱۶؍ سالہ کریئر میں گاوسکر نے ۱۲۵؍ ٹیسٹ میچوں میں۱۰؍ہزار۱۲۲؍رن بنائے تھے جن میں ۳۴ سنچریاں اور ۴۵؍نصف سنچریاں شامل ہیں۔
 بہترین تکنیک اور مضبوط ڈفینس کی خوبیوں سے مالامال گاوسکر پہلے ایسے ہندوستانی کھلاڑی تھے جنہوں نے ہندوستانی کھلاڑیوں کو پرفیشنلزم سے روبرو کرایا۔ کرکٹ سے ریٹائرمنٹ کے بعد ٹی وی کمنٹیٹر، مصنف اور تجزیہ کار کا کردار انہوں بخوبی ادا کیا۔ وہ آئی سی سی کرکٹ کمیٹی کے چیئرمین رہنے کے علاوہ کئی انتظامی عہدوں پر بھی کام کیا ہے۔عالمی کرکٹ کا سب سے معزز نام سنیل گاوسکرنے ہندوستانی کرکٹ کو عالمی پہچان دلانے  میں اہم کردار ادا کیا۔