انگلینڈ کا۲۴؍برس بعد انڈر۱۹؍ ورلڈ کپ کے فائنل میں داخلہ

Updated: February 03, 2022, 12:44 PM IST | Agency | North Sound

بار ش سے متاثر میچ میں افغانستان کو ڈک ورتھ لوئیس ضابطے کے مطابق ۱۵؍رن سے شکست دے کر فائنل میں جگہ بنائی

انگلینڈ کے گیندباز ریحان احمد نے افغانستان کے ۴؍وکٹ لئے ۔ تصویر: آئی این این

 انگلینڈ نے جارج تھامس (۵۰؍رن)، جارج بیل (ناٹ آؤٹ ۵۶؍ رن) اورالیکس ہارٹن (ناٹ آؤٹ۵۳؍رن) کی شاندار نصف سنچریوں اور لیگ اسپنر ریحان احمد (۴۱؍ رن دے کر۴؍ وکٹ) کی مہلک گیند بازی سے افغانستان کو ڈک ورتھ لوئیس اصول کے تحت۱۵؍ رن سے شکست دینے کے بعد انڈر۱۹؍ ورلڈ کپ کے فائنل میں جگہ بنالی۔اس کے ساتھ ہی افغانستان کا پہلی بار آئی سی سی ورلڈ کپ کے فائنل میں پہنچنے کا خواب  ٹوٹ گیا۔ انگلینڈ کی ٹیم ۲۴؍ سال بعد انڈر۱۹؍ ورلڈ کپ کے فائنل میں پہنچی ہے۔ منگل کو کھیلے جانے والے سیمی فائنل میں بارش کی وجہ سے میچ کو۴۷۔۴۷؍ اوور تک کم کرنا پڑا۔ انگلینڈ نے پہلے بیٹنگ کرتے ہوئے۴۷؍ اوورس میں۶؍ وکٹوں پر۲۳۱؍رن  بنائے تھے جس کے جواب میں افغانستان کی ٹیم۹؍ وکٹوں پر۲۱۵؍ رن ہی بنا سکی۔ اب فائنل میں انگلینڈ کا مقابلہ آسٹریلیا اور  ہندوستان کے درمیان دوسرے سیمی فائنل کے فاتح سے ہوگا۔ افغانستان کی ٹیم پہلی بار سیمی فائنل میں پہنچی تھی اور اسے ناتجربہ کاری کا خمیازہ بھگتنا پڑا۔ اس میچ میں انگلینڈ نے پہلے بیٹنگ کی تھی اور ایک موقع پر افغانستان نے انگلینڈ کے۶؍ وکٹ۱۳۱؍ رن پر لے لئے تھے۔ ایسا لگ رہا تھا کہ افغانستان کی ٹیم تاریخ رقم کرنے میں کامیاب ہو جائے گی لیکن افغانستان کی ٹیم ایسا نہ کر سکی۔ آخری۱۲؍ اوورس میں افغانستان کی گیندبازی بہت خراب رہی۔ ان کے گیند بازوں نے۹۵؍ رن دئیے۔ اس ایک غلطی نے ٹیم کو ڈھانپ دیا اور۶؍ وکٹ گنوانے کے باوجود انگلینڈ نے ۲۳۱؍ رن  کا چیلنجنگ اسکور بنایا۔  انگلینڈ کیلئے اس کے اوپنر جارج تھامس نے شاندار نصف سنچری  بنائی  تاہم ان کے علاوہ ٹاپ آرڈر میں کوئی اور بلے باز۲۰؍ رن کا ہندسہ بھی نہ چھو سکا۔لیکن مڈل آرڈر میں جارج بیل نے۶۷؍ گیندوں پر ناٹ آؤٹ ۵۶؍رن  اور ہارٹن نے۳۶؍ گیندوں پر ناٹ آؤٹ۵۳؍ رن  بنا کر انگلینڈ کو ۴۷؍ اوورس میں۲۳۱؍ رن  تک پہنچا دیا۔ ہدف کا تعاقب کرنے والی افغانستان کی ٹیم کا آغاز اچھا نہیں رہا۔ ٹیم کا پہلا وکٹ تیسری گیند پر ہی گرگیا۔ اس کے بعد اسکور بورڈ پر صرف ایک رن کا اضافہ ہوا  تاہم اس کے بعد افغان بلے بازوں نے دوسرے  وکٹ کیلئے ۹۳؍ رن  جوڑے اور انگلینڈ کے کیمپ میں خوف و ہراس پھیلا دیا لیکن۹۴؍ رن  کے اسکور پر محمد اسحاق (۴۳؍رن) کے رن آؤٹ ہونے کے بعد افغانستان نے تیزی سے مزید۲؍وکٹ گنوا دیئے اور ٹیم کا اسکور ۴؍ وکٹوں کے نقصان پر۱۰۶؍ رن  ہوگیا  تاہم بلے بازوں نے ۵؍ویں وکٹ کیلئے نصف سنچری شراکت کرکے  افغانستان کی ٹیم کو میچ میں واپس  لادیا۔ انگلینڈ کے لیگ اسپنر ریحان احمد نے ۴؍ وکٹ لے کر انگلینڈ کو فائنل میں پہنچانے کیلئے افغانستان کی امیدوں پر پانی پھیر دیا۔