؍۲؍ جنوری کوعام آدمی پارٹی کی’ روزگار گرانٹی مہاریلی‘، کامیاب بنانےکی تیاریاں

Updated: December 31, 2021, 12:07 PM IST | Agency | Lucknow

آپ کے یو پی انچار ج اور راجیہ سبھا رکن سنجے سنگھ کی پریس کانفرنس ، کہا :’’لکھنؤ میں ہونے والی ریلی تاریخی ہوگی، پارٹی کارکنوں اور عوام میں زبردست جوش و خروش ہے۔ ‘‘

  ؍ ۲؍ جنوری کو  اتر پردیش کے دارالحکومت لکھنؤ میں عام آدمی پارٹی کی مہاریلی ہوگی۔اس کی بڑے پیمانے پر تیاری کی جار ہی ہے۔  لکھنؤ اور اطراف کے اضلاع میں کارکن گھر گھر جا کر عوام سے مہا ریلی  میں شرکت کی اپیل کر رہے  ہیں۔  عام آدمی پارٹی کے ریاستی انچارج  اور راجیہ سبھا  رکن سنجے سنگھ نے  جمعرات کو پارٹی دفتر میں منعقدہ پریس کانفرنس کے دوران کہا :’’اتر پردیش کے عوام تبدیلی چاہتے ہیں، جس کا فائدہ عام آدمی پارٹی کو اسمبلی انتخابات میں ملنے والا ہے۔ کیجریوال جی کی لکھنؤ میں ہونے والی مہاریلی تاریخی ہو گی۔ ریلی سے متعلق پارٹی کارکنوں اور عوام میں زبردست جوش و خروش ہے۔ مہا ریلی کیلئے پارٹی کی جانب سے مکمل تیاریاں کی جا رہی ہیں۔ روزگار گارنٹی مہا ریلی کی تیاری کیلئے پارٹی کے سینئر لیڈروں کو مخصوص علاقوں کا ریلی انچارج  بنایا گیا ہے۔‘‘
  سنجے سنگھ نے  مزید   بتایا :’’ ہماری پارٹی نے آگرہ، شاملی، نوئیڈا، غازی آباد، اجودھیا  اور دیگر اضلاع میں ترنگا یاترا نکالی جو پوری طرح کامیاب رہی۔عام آدمی پارٹی کے قومی کنوینر اروند کیجریوال جی کی۲؍ جنوری کو لکھنؤ میں مہا ریلی ہوگی۔ شہر کے اسمرتی اپون میدان میں ہونے والی ’روزگار گارنٹی مہا ریلی‘۱۱؍ بجے ہوگی۔‘‘ اُنہوں نے کہا:’’ اس ریلی میں مہنگائی، بے روزگاری، بجلی، ۲۴؍ گھنٹے میں صرف۱۰؍ گھنٹے بجلی، بجلی بل بقایا، پانی، تعلیم، کسان اور خواتین تحفظ جیسے مسائل پر اروند کیجریوال جی خطاب کریں گے۔‘‘
  عام آدمی پارٹی کے ریاستی انچارج سنجے سنگھ نے اتر پردیش کے عوام سے اپیل کرتے ہوئے کہا :’’ مہا ریلی میں بڑی تعداد میں شامل ہو کر  اسےکامیاب بنائیں۔ وزیر اعلیٰ کیجریوال یو پی کے بے روزگار نوجوانوں کیلئے بڑا اعلان کریں گے۔ صوبے میں بیٹیوں کے خلاف بڑھتے جنسی جرائم، چندہ چوری، مہنگائی اور بدعنوانی سے تنگ یوپی کے عوام یوگی حکومت کو بدلنے کیلئے عام آدمی پارٹی کی طرف بڑی امید سے دیکھ رہی ہے۔‘‘
  سنجے سنگھ نے پریس کانفرنس میں کہا :’’ لوگ ہم سے پوچھتے ہیں کہ آپ کی پارٹی یوپی میں کیسے کامیاب ہو پائے گی؟ میں اُن لوگوں کو جواب دینا چاہتا ہوں کہ ہماری پارٹی امید سے زیادہ بہتر نتائج حاصل کرے گی۔ اُتر پردیش میں ضلع پنچایت انتخابات میں ۴۰؍ لاکھ ووٹ عام آدمی پارٹی کو ملے جبکہ۸۳؍ ضلع پنچایت ممبر کامیاب ہوئے۔‘‘
   اُنہوں نےیہ بھی کہا :’’ چنڈی گڑھ میونسپل کارپوریشن کے نتائج کا اثر اتر پردیش کے اسمبلی انتخابات پر ہونے والا ہے کیونکہ `کیجریوال حکومت کے ترقیاتی ماڈل کو یو پی کے عوام بھی پسند کر رہے ہیں۔ یہی وجہ ہے کہ عام آدمی پارٹی پر یہاں کے لوگ بھروسہ کر رہے ہیں جس کا پارٹی کو اسمبلی انتخابات میں زبردست فائدہ ملنے والا ہے۔‘‘
  ریاستی انچارج سنجے سنگھ نے یہ بھی دعویٰ  کیا:’’ `کیجریوال حکومت کے ترقیاتی ماڈل کو دیکھتے ہوئے یو پی کے عوام ہماری پارٹی کو ووٹ  دیں گے۔ عام آدمی پارٹی کی حکومت پنجاب میں بنے گی، ساتھ ہی اتراکھنڈ اور گوا میں بھی پارٹی شاندار کامیابی حاصل کرے گی۔ یوپی کے عوام سیاسی تبدیلی کیلئے آگے آ رہے ہیں اور عام آدمی پارٹی پر بھروسہ کر رہے ہیں۔‘‘