آگرہ کے شاہان علی محسن نے ایم آرایف فارمولا۱۶۰۰؍ کاخطاب جیتا

Updated: February 20, 2022, 1:28 PM IST | Agency | Agra

انڈین نیشنل کار ریسنگ چمپئن شپ کے چوتھے اور آخری راؤنڈ میں آگرہ کے شاہان علی محسن نے شاندار کارکردگی کا مظاہرہ کیا اور چمپئن بنے

شاہان علی محسن۔ تصویر :آئی این این

اتوار کی شام چنئی میں ختم ہونے والی انڈین نیشنل کار ریسنگ چمپئن شپ کے چوتھے اور آخری راؤنڈ میں آگرہ کے شاہان علی محسن نے  شاندار کارکردگی کے ساتھ ایم آر ایف فارمولا ۱۶۰۰؍کا قومی خطاب جیت لیا۔ ۹؍ سال کی عمر سے پروفیشنل ریسنگ کرنے والے شاہان اس سے قبل ۴؍ بار نیشنل کارٹنگ چمپئن اور ایک بار ایشیا چمپئن رہ چکے ہیں۔ چمپئن شپ جیتنے کے بعد شاہان نے کہا ’’ یہ میرے لئے یادگار لمحہ ہے۔ میں نے اس سے پہلے ۴؍ قومی اور ایک ایشیا چمپئن شپ جیتی ہے لیکن یہ میری پہلی قومی کار ریسنگ خطاب فتحہے۔ ایم آر ایف۱۶۰۰؍ فارمولا کارریسنگ پریمیم کیٹیگری ہوتی ہے اس کا چمپئن بننا میرے لئے اعزازکی بات ہے۔ بہت کانٹے کی ٹکر تھی، پہلے ۷؍ ڈرائیور صرف ایک سکینڈ کے فرق میں تھے اورپہلے ۳؍ تو صرف ایک سکینڈ کے ۱۰؍ویں حصے میں تھے۔ اس لئے صحیح حکمت عملی بنانا بہت ضروری تھا۔ چمپئن شپ کا فیصلہ فائنل راؤنڈ کی آخری ریس کے آخری لیپ میں ہوا، ہر لمحہ دلچسپ تھا۔‘‘ فائنل راؤنڈ شروع ہونے سے پہلے  شاہان بنگلور کے اپنے قریبی حریف چراغ گھورپڑے سے ۱۳؍پوائنٹس پیچھے تھے۔ اس راؤنڈ میں شاہان کا ہدف صرف چراغ کو پیچھے رکھنا اور بغیر کسی خطرے کے ۳؍ ریس مکمل کرنا تھا۔ فائنل راؤنڈ کے الیفائنگ راؤنڈ میں شاہان دوسرا اور چراغ نے چوتھا مقام حاصل کیا۔ اس کے بعد پہلی ریس میں شاہان نے چراغ کو پیچھے رکھتے ہوئے دوسرا مقام حاصل کیا۔ اس سے دونوں کے درمیان۱۳؍پوائنٹس کا فاصلہ کم ہوکر ۱۰؍ پوائنٹس کا رہ گیا۔ دوسری ریس ریورس آرڈر کی ہونے کی وجہ سے شاہان نے ۷؍ویں پوزیشن سے اور چراغ نے چھٹی پوزیشن سے شروع کیا۔ شاہان نے چراغ کو اوورٹیک کرتے ہوئے دوسری پوزیشن حاصل کی جبکہ چراغ ۷؍ویں نمبر پر رہے۔ اس شاندار کارکردگی سے شاہان نے چمپئن شپ میں ۲؍ پوائنٹس کی برتری حاصل کر لی۔ تیسری ریس فیصلہ کن تھی، شاہان یاچراغ میں سے جو بھی آگے رہتا، وہی قومی چمپئن بنتا۔ شاہان نے ریس کے ۵؍ویں لیپ میں شاندار طریقے سے  چراغ کو اوورٹیک کیا اور پھر حفاظتی ریس جاری رکھتے ہوئے اسے آگے نکلنے نہیں دیا۔بنگلور کے رِشون راجیو ریس میں پہلے نمبر پر تھے لیکن شاہان کا ہدف صرف چراغ کو پیچھے رکھنا تھا، انہیں معلوم تھا چمپئن شپ کے کل پوائنٹس میں رشون بہت پیچھے ہیں۔